Rekja fjöldamorðið í Örebro til gremju byssumannsins vegna lífs síns

Sænska lögreglan greindi frá niðurstöðum rannsóknar sinnar á fjöldamorðinu í Campus Risbergska-skólanum í morgun. Byssumaðurinn svipti sig lífi þegar lögreglumenn komu á vettvang og því verða engin réttarhöld í málinu. Rannsókn leiddi í ljós að maðurinn stóð einn að verki.

Engar vísbendingar fundust um að byssumaðurinn hefði verið knúinn áfram af hugmyndafræði, pólitískum skoðunum eða andúð á einstaklingum eða hópum fólks.

Sjö konur og þrír karlar féllu í árásinni og sex særðust til viðbótar.

Lifði á bótum og féll á stærðfræðiprófi

Morðinginn hét Rickard Andersson og var 35 ára gamall. Hann stundaði nám í stærðfræði við Campus Risbergska-skólann, þar sem boðið var upp á endurmenntun, á árunum 2019 til 2021 en féll á prófum og hætti sjálfur námi.

Andersson lifði af opinberum bótum allt sitt fullorðnislíf og lögregla telur að hann hafi stundað nám við Risbergska til þess að reyna að fá vinnu og geta staðið á eigin fótum. Fjárhagslegt óöruggi og hafnanir hafi orðið kveikjan að ódæðinu.

„Þetta skapar vaxandi gremju og vonleysi sem við sjáum að breyttist í ósk um að svipta sig lífi,“ sagði Henrik Dahlström frá sænsku lögreglunni á blaðmannafundi í morgun.

Hann virðist hafa skotið fólk af handahófi en fórnarlömbin voru þverskurður af nemendum og starfsfólki skólans, að sögn lögreglu.

„Ekkert við verknaðinn bendir til þess að þetta hafi verið hefndarverk sem beindist að ákveðnu fólki eða hópi fólks,“ sagði Dahlström.

Hvorki sími né tölvugögn fundust

Ákaflega takmarkaðar upplýsingar sem hefðu mögulega getað varpað frekara ljósi á hugarástand og hugmyndaheim Andersson, eins og leitarsaga á netinu, fundust þó. Lögreglu tókst ekki að finna síma hans sem síðast var kveikt á nokkrum dögum fyrir fjöldamorðið. Þá hafði harði diskurinn verið fjarlægður úr fartölvu og tveimur borðtölvum sem fundust við húsleit á heimili hans.

„Okkar mat er að sá grunaði hafi vísvitandi valið að vera ósýnilegur, bæði í stafræna heiminum og í raunheimum. Hann bjó einn og skildi ekki eftir sig mikla slóð,“ sagði Dahlström.

Þannig hafa litlar sem engar upplýsingar fundist um Andersson á netinu sem virðist hafa gætt þess að eyða öllum mögulegum sönnunargögnum fyrir árásina.

Dahlström sagði lögregluna afar meðvitaða um að hana skorti mikilvæg gögn. „Það er klárt að við vildum óska þess að við hefðum getað skýrt þetta enn betur.“

Var á örvandi efnum

Lögreglan telur að Andersson hafi byrjað að undirbúa skotárásina síðasta haust. Hann hafi selt eða reynt að selja eigur sínar og leitað að upplýsingum um viðhald á skotvopnum. Hann náði í gítartösku til foreldra sinna í september eða október en skildi gítarinn sjálfan eftir. Töskuna notaði hann síðar til þess að koma þremur byssum sínum inn í skólann.

Í seinni hluta janúar keypti Andersson skotfæri, hnífa og reyksprengjur. Engar upplýsingar fundust um að Andersson hefði notað skotvopn sín fyrir árásinu nema þegar hann fékk byssuleyfið árið 2011. Hann virðist ekki hafa hleypt af byssu á skotæfingasvæði eða við veiðar.

Byssumaðurinn kom með strætó í skólann rétt fyrir klukkan átta að morgni fjöldamorðsins. Þegar inn var komið fór hann inn á salerni þar sem hann virðist hafa haldið lengi til. Í klósettbás fundust meðal annars dósir með leifum af örvandi efnunum kókaíni og amfetamíni. Lögregla telur að hann hafi verið undir áhrifum slíkra efna þegar hann framdi ódæðið.

Lögreglan segir að miðað við vopnin og skotfærin sem Andersson viðaði að sér hafi hann ætlað sér að skjóta margt fólk. Reyksprengjurnar bendi til þess að hann hafi ætlaði sér að valda glundroða til þess að valda eins miklum skaða og hann gæti og torvelda hjálparstarf.