Innlent

„Þetta er bara brandarakvöld“

Jakob Bjarnar skrifar
Gísli, Andrés og Stefán, Þjóðmálahlaðvarpararnir eiga nú yfir höfði sér ofsareiði stuðningsmanna Flokks Fólksins fyrir að hafa hæðst hömlulaust að helstu fulltrúum þess flokks.
Gísli, Andrés og Stefán, Þjóðmálahlaðvarpararnir eiga nú yfir höfði sér ofsareiði stuðningsmanna Flokks Fólksins fyrir að hafa hæðst hömlulaust að helstu fulltrúum þess flokks. vísir/vilhelm

Stefán Einar Stefánsson fjölmiðlamaður segir ekki hægt að svara þeirri ofsareiði sem brotist hefur út í athugasemdakerfum víðs vegar eftir fjörugt bjórkvöld Þjóðmála á Kringlukránni.

DV greindi frá efni kvöldsins á vef sínum í gær en margir supu hveljur þegar Stefán Einar og Andrés Magnússon, fulltrúi ritstjóra á Morgunblaðinu, fóru hinum háðulegustu orðum um fulltrúa Flokks Fólksins, einkum þau Ásthildi Lóu Þórsdóttur fyrrverandi barna- og menntamálaráðherra og svo Guðmund Inga Kristinsson sem tók við embættinu:

„Starfsmenn Morgunblaðsins létu vaða á súðum á bjórkvöldi – Sögðu Guðmund Inga varla læsan og líktu Ásthildi Lóu við frægan eltihrelli“ er fyrirsögnin sem DV keyrir frásögn sína undir og segir hún sína söguna.

Í frétt rekur blaðamaður ítarlega það sem sagt var á kvöldinu. En þeir Andrés og Stefán Einar fóru, ásamt Gísla Frey Valdórssyni, „fyrrum aðstoðarmaður Hönnu Birnu Kristjánsdóttur, fyrrverandi ráðherra Sjálfstæðisflokksins“ tekur penni DV fram, mikinn.

Stefán Einar og Andrés í miklu stuði

Að sögn DV, sem leggur nokkuð uppúr því að leiðrétta ónákvæmni í tali þeirra Andrésar og Stefáns Einars, líktu þeir Ásthildi Lóu við frægan eltihrelli sem sjá má í sjónvarpsþáttunum Baby Reindeer. Og áfram rekur blaðamaður DV það sem á gekk:

„Fór það mikið í taugarnar á Andrési og Stefáni Einari að svo margir hefðu komið Guðmundi Inga og Ásthildi Lóu til varnar. Sagði Stefán Einar um það:

„Hvað sagði Björg Eva Erlendsdóttir?: Ég gæti ekki hugsað mér að hafa barnamálaráðherra sem hefði ekki gert neitt svona af sér. Það er bara ég gæti ekki hugsað mér að hafa landlækni sem hefði ekki drepið mann. Hvaða rugl er þetta?“

Raunar var það kona Bjargar, Þóra Kristín Ásgeirsdóttir, sem viðhafði umrædd ummæli en þó ekki með þeim hætti sem Stefán Einar hélt fram,“ segir meðal annars í umfjöllun DV. Ljóst er að ekki fóru þeir Andrés og Stefán alltaf nákvæmt með; vildu augljóslega ekki láta staðreyndir skemma frásögnina.

Ofsareiði brýst út

En í athugasemdkerfi DV sjá menn hins vegar ekkert sniðugt við þetta og hefur þar brotist út ofsareiði. Menn keppast um að úthúða þeim Þjóðmálamönnum:

„Svo er þessi fáráður hissa á að fólk úr stjórnarflokkunum vilji ekki koma í þáttinn hjá honum !! sjálfTökuflokkurinn er viðbjóðslegur flokkur og virðist að mestu vera samansafn af rasshausum sem enginn vill vinna með,” segir einn og annar bætir við: „Illa innrættir þessir moggaaular.“ Annar segir „Þetta er botninn“. Og þannig gengur dælan: „Það verður vart verra skítlega eðlið en í þessum ofangreindum sjálfstæðisskíthælum!“ …

Stefán Einar lætur hins vegar sem ekkert sé þegar hann er spurður hvort hann vilji bregðast við þessu á einhvern hátt. Hann segir það ekki hægt en bendir þó á að þarna verði að gera greinarmun:

„Menn verða að gera greinarmun á uppistandi og alvarlegri umræðu. Þetta er bara brandarakvöld og skemmtidagskrá. Sumargleðin,“ segir Stefán Einar og hlær.


Tengdar fréttir

Ást­hildur Lóa hefur sagt af sér: Ekki sama manneskja í dag og fyrir 36 árum

Ásthildur Lóa Þórsdóttir, barnamálaráðherra og þingmaður Flokks fólksins hefur sagt af sér ráðherraembætti. Fyrr í kvöld var greint frá því að hún hefði átt í sambandi þegar hún var 22 ára með sextán ára pilti sem hún leiðbeindi í trúarsöfnuði. Þau eignuðust svo barn saman ári síðar. 

Spyr um ábyrgð skólastjóra í stóra skómálinu

Formaður Flokks fólksins segir Ásthildi Lóu Þórsdóttur einfaldlega hafa sagt af sér til að koma í veg fyrir að ráðist yrði á sig og ríkisstjórnina í fjölmiðlum. Barnabarn hennar sem glataði skóm tímabundið í Borgarholtsskóla hafi ekki sótt skólann síðan fjallað var um símtal hennar við skólastjórann. Inga spyr um ábyrgð hans.

Guðmundur Ingi ávarpaði menntafólk á leiðtogafundi

Guðmundur Ingi Kristinsson nýr mennta- og barnamálaráðherra segir áskoranir í skólakerfinu aukst og samfélagið standi á tímamótum. Hann vonar að að leiðtogafundur í menntamálum hjálpi til við sameiginlegt markmið þátttakenda að gefa kennurum tólin til að hjálpa börnum að mæta áskorunum sínum.




Fleiri fréttir

Sjá meira


×