Íslenski boltinn

„Allir í Vestur­bænum eru spenntir en maður hefur séð meiri gæði í einum hópi“

Ingvi Þór Sæmundsson skrifar
KR-ingar eru brattir fyrir tímabilið sem framundan er.
KR-ingar eru brattir fyrir tímabilið sem framundan er. vísir/diego

Baldur Sigurðsson, sérfræðingur Stúkunnar, segir að stuðningsmenn KR geti leyft sér að vera bjartsýnir fyrir komandi tímabil.

KR er spáð 4. sæti Bestu deildar karla í spá íþróttadeildar Vísis og Stöðvar 2. Síðasta tímabil var erfitt í Vesturbænum og KR-ingar enduðu í 8. sæti.

„Ég held að það sé algjörlega málið og það er svo sannarlega raunin miðað við þá KR-inga sem ég hef hitt á leikjum og bara úti í bæ. Það er það sem KR hefur þurft síðustu ár og maður hefur svolítið saknað úr Vesturbænum. Það er einmitt þessi spenningur og gleði. Þetta hefur allt verið voða neikvætt síðan 2019 og hálfgert vonleysi,“ sagði Baldur.

„Árangurinn hefur ekki verið góður og það náði, ég ætla ekki að segja lágpunkti, en þetta var ekki gott tímabil, mjög slæmt tímabil. En þetta lítur allt öðruvísi út í dag. Óskar (Hrafn Þorvaldsson, þjálfari KR) búinn að umbylta liðinu, fá inn uppalda stráka.“

Klippa: 4. sæti KR

Baldur er efins um að leikmannahópur KR sé samt nógu sterkur til að liðið geti náð Evrópusæti.

„Allir í Vesturbænum eru spenntir og svo á eftir að koma í ljós hvað Óskar nær að gera með þennan hóp því ef maður horfir yfir nöfnin hefur maður alveg séð meiri gæði í einum hópi; það sem þeir hafa sýnt og sannað í Bestu deildinni. Það eru ekki margir af þessum leikmönnum sem hafa gert það. Það er spennandi að sjá hversu hratt Óskar nær að búa til lið. Þeir geta í besta falli náð upp í Evrópusæti en ég er samt ekki einu sinni viss um að þeir verði í Evrópubaráttu þegar kemur í lokin,“ sagði Baldur.

KR sækir KA heim í fyrsta leik sínum í Bestu deildinni á sunnudaginn 6. apríl.




Fleiri fréttir

Sjá meira


×