Vill fá svör um hvað fór úr­skeiðis um helgina

Ríkissáttasemjari boðaði deiluaðila í kjaradeilu grunn- og leikskólakennara á samningafund í dag klukkan hálf tvö. Samningafundurinn stóð enn þegar fréttastofa hafði samband á sjötta tímanum og gekk vel. 

Rætt var um kjaradeiluna í Pallborðinu í dag þar sem Ragnheiður Stephensen trúnaðarmaður kennara og grunnskólakennari í Garðaskóla í Garðaskóla fagnaði að ríkið sé tilbúið í að fara í virðismat á störfum kennara. En það hafi  slitnað hafi upp úr viðræðum um helgina því ekki hafi verið boðið nóg. 

„Ríkisstjórnin segist vera tilbúin að leggja í peninga þannig að hægt sé að ganga frá samningum. Gerum það. En áttum okkur á að þetta eru önnur tvö ár sem er verið að tala um og þessi sex prósent aukalega sem er verið að tala um við okkur eru ekki nóg. Við vorum komin á einhvern stað um helgina. Ég bind vonir við að fólk sé ekki  fara í skotgrafirnar núna.  Það var boðað til fundar í dag og ég bind vonir við að  fólk þar átti sig á því að við erum búin að bíða í níu ár eftir því að fari verði að samningum sem voru gerðir við okkur,“ sagði Ragnheiður í Pallborði í dag.

Krefst svara

Jón Pétur Zimsen þingmaður Sjálfstæðisflokks og fyrrverandi skólastjóri segir mikilvægt að almenningur fá að vita hvað fór úrskeiðis í deilunni um helgina.

„Ég óska eftir að pólitíkin komi fram og segi það. Magnús og félagar töldu sig vera að fara skrifa undir kjarasamning um helgina. Það er ekki boðlegt fyrir íslenskt samfélag að fá ekki að vita hvað breyttist. Allir þeir sem eru í forustu bæði hjá launanefnd, kennara, ríkisins þurfa að hugsa sig alvarlega um. Það eru börn undir,“ sagði Jón í pallborði í dag.

Segir foreldra hafa orðið fyrir aðkasti

Kristófer Már Maronsson aðili í Málsóknarfélagi barna sem hefur nú óskað eftir að Landsréttur skeri úr um lögmæti verkfallsaðgerða kennara segist styðja þá í kjaradeilunni. Hann segir ekkert óeðlilegt að vera hluti af málsókninni en hann er einnig formaður fræðslunefndar Skagafjarðar. Félagsfólk í leikskólum telur hann hafa brotið siðareglur með stefnunni. 

„Við foreldrar óskuðum eftir því að fá svör af hverju verkföllin væru aðeins í fjórum leikskólum sem hafa nú verið bráðum í sex vikur í verkfalli. Við fengum engin svör. Við erum fyrst og fremst að hugsa um hag barnanna okkar. Okkur er það skylt samkvæmt lögum um leikskóla. Við teljum að það sé verið að brjóta lög, Þó maður leiti réttar síns af því það er verið að brjóta á manni á einum stað þá eru hagsmunirnir mismunandi. Mér fannst rökstuðningur fyrir því að ég hefði brotið siðareglur heldur þunnur. Ef það verður niðurstaðan spyr ég hvort eitthvert foreldri geti setið í skólanefnd í sínu sveitarfélagi,“ segir Kristófer. 

Hann segir foreldra í málsvarnarfélaginu hafa orðið fyrir aðkasti. 

„Aðkasti hefur ekki verið beint til mín en ég hef fengið skjáskot af því sem fólk er að skrifa um mig. Ég hef meira og minna verið í símanum og tekið við skilaboðum til að styðja mig áfram í þessari baráttu. Ég vil að fólk geti leitað til dómstóla án þess að verða fyrir áreiti í íslensku samfélagi,“ segir Kristófer.  

Pallborðið í heild sinni.