Biðjast af­sökunar á að hafa sært lista­menn

Alls sóttu 1339 einstaklingar og sviðslistahópar um listamannalaun og þar af fá 251 úthlutun úr Launasjóði listamanna á næsta ári. Listamannalaun næsta árs verða 580 þúsund krónur á mánuði í verktakagreiðslu, sem er úthlutað eftir atvikum í þrjá til tólf mánuði til hvers listamanns.

Þórhallur Guðmundsson stjórnsýslufræðingur sagði í viðtali við Vísi í gær að honum sýndist sem umsagnir sem umsækjendur hefðu fengið við synjun bæru ekki vott um æskilega stjórnsýslu.

„Mjög margir eru sármóðgaðir og maður skilur það. Íslendingar eru svo sem móðgunargjörn þjóð og það þarf ekki mikið að koma til en þetta er spurning um starfsheiður og hversu mikið stjórnvald eigi að vera að dæma um getu fólks til sköpunar,“ sagði Þórhallur.

Stjórn listamannalauna skipa Jónatan Garðarsson formaður, Kolbrún Ýr Einarsdóttir og Eva María Árnadóttir. Ekki hefur náðst í formann nefndarinnar í vikunni. Í tilkynningu frá stjórninni í morgun segir að fagfélög listamanna hafi eindregið óskað eftir því síðustu ár að umsækjendur um listamannalaun fengu skýrari svör um ákvörðun úthlutunarnefnda.

„Við úthlutun listamannalauna árið 2025 ákvað stjórn listamannalauna í samráði við fagfélög listamanna og úthlutunarnefndir launasjóðanna að bregðast við þessari ósk og gera þá tilraun að láta ákvörðunartexta umsókna fylgja svarbréfum til umsækjenda.“

Það hafi ekki borið tilætlaðan árangur.

„Því miður gekk þessi tilraun ekki eins og til stóð og í tilvikum voru ákvörðunartextar til þess að særa umsækjendur. Stjórn listamannalauna þykir þetta miður og biður þá listamenn sem um ræðir innilega afsökunar. Það hvort ákvörðunartextar fylgi svarbréfum verður tekið til ítarlegrar skoðunar fyrir næstu úthlutun.“

Á næstu dögum muni stjórn listamannalauna funda og ræða við úthlutunarnefndir eftir atvikum.

Listamönnum var tilkynnt um niðurstöðu umsókna á mánudaginn. Meðal þeirra sem ekki fengu úthlutað styrk var Guðrún Arndís Tryggvadóttir myndlistakona. Hún tjáði sig um niðurstöðuna á Facebook og vísaði til ákvörðunartexta úthlutunarnefndarinnar.

„Ég ætlaði að harka af mér og taka ekki þátt í kvartkór listamanna sem ekki fá listamannalaun þetta árið en ég get ekki orða bundist yfir ákvörðunartextanum sem ber vott um fádæma fávísi jafnvel kvenfyrirlitningu því jú ég hef átt „slitróttan feril“ god damn it, því ég hef þurft að sjá mér og mínum börnum farborða án fyrirvinnu en samt alltaf á grundvelli listar hönnunar, listkennslu eða umhverfisfræðslu því að ég er jú hugmyndasmiður, grunngildi listarinnar er hugmyndavinna,“ sagði Guðrún Arndís.

Til úthlutunar voru 1720 mánaðarlaun úr átta launasjóðum: hönnuða, myndlistarmanna, rithöfunda, sviðslistafólks, tónlistarflytjenda, tónskálda, kvikmyndahöfunda og Vegsemd fyrir listamenn 67 ára og eldri. Tveir síðastnefndu sjóðirnir bættust við með breytingum sem gerðar voru á lögum um listamannalauna í sumar.

Meðal þeirra sem hljóta úthlutun úr launasjóði rithöfunda eru Eiríkur örn Norðdahl, Hallgrímur Helgason og Sigríður Hagalín Björnsdóttir. Fá Edda Björgvinsdóttir, Margrét Bjarnadóttir og Jóhann Kristófer Stefánsson meðal annara úthlutun úr launasjóði sviðslistafólks. Hildigunnur Einarsdóttir er sú eina sem fær laun í tólf mánuði úr launasjóði tónlistarflytjenda, en þar eru einnig á lista Ragnheiður Gröndal, Sigríður Thorlacius og Valdimar Guðmunsson, svo nefnd séu nokkur nöfn.

Meðal þess sem lögð var áhersla á í ár var að listsköpun væri höfð í forgrunni, og stuðst við fyrir fram skilgreindan matskvarða við ákvörðun úthlutunar. Þá var áhersla einnig á nýliðun, en miðað var við að að lágmarki 7% mánaða úr hverjum sjóði væri úthlutað til nýliða.