Amma, Anníe og hinar eftir­minni­legustu stundirnar á ferli Katrínar Tönju

Buttery Bros fengu okkar konu til að velja fimm bestu stundirnar frá ótrúlegum ferli sínum. Þeir tveir hafa margoft fengið að heimsækja Katrínu þegar hún er að undirbúa sig fyrir heimsleikana og hafa í framhaldinu birt myndbönd með henni á Youtube síðunni sinni.

Ekki auðvelt að velja

Katrín Tanja viðurkenndi að það hafi ekki verið auðvelt að velja uppáhaldsgreinar hennar á heimsleikunum enda er víst af nægu að taka.

Katrín varð tvisvar sinnum heimsmeistari, komst tvisvar að auki á verðlaunapallinn og tók alls þátt í tíu heimsleikum.

Meðal stundanna sem Katrín nefndi var þegar hún lyfti við hlið vinkonu sinnar Anníe Mistar Þórisdóttur á 2023 leikunum þar sem þær kveiktu í húsinu með keppnisgleði sinni, styrk og vináttu.

Hálsmennið hennar ömmu

Katrín nefnir líka þegar hún varð heimsmeistari í annað skiptið en þá var hún nýbúin að missa ömmu sína. Hún keppti með hálsmenið sem þær áttu hvor fyrir sig. 

Katrín hélt um hálsmenið um leið og það var tilkynnt þegar hún varð heimsmeistari. Sannkölluð vasaklútastund. Hún hafði skrifað amma á skóna sína og sagðist hafa horft á þá allan tíma þegar hún var að undirbúa hverja lyftu.

„Uppáhaldsstundirnar mínar eru alltaf þegar ég er á fullu í jafnri keppni því ég elska að taka þátt í keppni þar sem pressan er mikil og það munar bara millimetrum,“ sagði Katrín Tanja.

Sú eina sem fagnaði fréttunum

Þarna má líka finn greinina sem allir keppendur héldu að þau væri búin að klára þegar íþróttastjórinn Dave Castro sagði að þau væru bara hálfnuð og ættu að fara annan hring. Katrín Tanja var sú eina sem fagnaði fréttunum og vann líka stórglæsilegan sigur.

Hún nefnir svo auðvitað líka stundirnar á fyrstu heimsleikunum sem hún fagnaði sigri en það var árið 2015. Það kemur kannski sumum á óvart hvað hún setti í fyrsta sætið. „Þetta eru augnablikin þar sem mér finnst ég vera mest á lífi. Þetta er svo sérstakt og þarna er adrenalínið heldur betur á fullu,“ sagði Katrín Tanja.

Buttery Bros voru líka þakklátir Katrínu fyrir að leyfa þeim að fylgjast svo náið með undirbúningi hennar.

Gefið svo mörgum innblástur

„Við viljum þakka þér fyrir að leyfa okkur að fá að vera með þér og mynda þessar stundir. Ég get aldrei lagt nógu mikla áherslu á það hvað við erum stoltir af því og hversu frábært það er að eiga þig sem vinkonu,“ sagði Heber Cannon.

„Þú varst það vingjarnleg að hleypa okkur inn á æfingarnar og leyfa okkur að trufla þig með myndavélum og spurningum. Þú ert alltaf bjart ljós í CrossFit samfélaginu. Þú hefur gefið svo mörgu fólki innblástur hvað þá öllum litlu stelpunum. Það hefur verið afar ánægjulegt að fá fylgjast með þér og fá að kynnast þér. Þvílíkur ferill,“ sagði Marston Sawyers.

Hér fyrir neðan má sjá Katrín Tönju velja eftirminnilegustu stundirnar frá mögnuðum ferli sínum.