Guð­mundur gæfi Kelleher risa samning: „Hverrar krónu virði og rúm­lega það“

Sem mark­mannsþjálfari írska lands­liðsins undir stjórn lands­liðsþjálfarans Heims Hall­gríms­sonar starfar Guð­mundur með Ca­oim­hin Kelleher sem hefur heldur betur gripið tækifærið með Liver­pool í fjar­veru aðal­mark­mannsins Alis­son, sem glímir við meiðsli, og varið hverja víta­spyrnuna á fætur annarri, nú síðast frá stór­stjörnu Real Madrid, Kyli­an Mbappé, í leik sem lauk með 2-0 sigri Liver­pool sem er á toppi bæði ensku úr­vals­deildarinnar sem og Meistara­deildarinnar um þessar mundir.

Kelleher hefur verið á mála hjá Liver­pool allan sinn at­vinnu­manna­feril en ávallt sem vara­skeifa. Írinn er aðeins 26 ára gamall og hefur sannað sig sem víta­bani með því að verja fjórar af sex víta­spyrnum sem lið hans hefur fengið á sig upp á síðkastið. Þá hefur hann átt stórar vörslur með Liver­pool og Ír­landi, unnið stig fyrir sitt lið og gæði hans dyljast ekki Guð­mundi sem hefur starfað með lands­liðsþjálfaranum Heimi yfir langa hríð núna.

„Þetta er flottur karakter. Góð persóna,“ segir Guð­mundur um Kelleher. „Hann er búinn að vera hjá Liver­pool frá því að hann var um sex­tán ára gamall. Þekkir ekkert annað en að vera í góðu liði, góðri liðsum­gjörð. Kelleher er með náttúru­lega hæfi­leika. Hann er mjög góður í öllu sem snýr að fót­bolta. Hugsar vel um sig, er góður fót­bolta­maður, nútíma­mark­maður sem les leikinn vel og er með góðar stað­setningar. Hefur í raun allt sem þú vilt sjá í góðum mark­manni. Svo er gaman að vinna með honum. 

Hann er alltaf til í að skoða hlutina upp á nýtt. Alltaf til í að leggja sig 100% fram en þar fyrir utan er hann mjög ró­legur og með báða fætur á jörðinni. Er ekki mikið fyrir það að vera í sviðsljósinu þó sviðsljósið elti hann er hann stígur inn á völlinn fyrir Liver­pool og írska lands­liðið. Það gustar ekkert um hann, ró­legur og yfir­vegaður og frábært að vinna með honum. Hann skilar alltaf sínu, er frábær í alla staði.“

Kelleher leitist sí­fellt eftir því að finna leiðir til að bæta sinn leik.

„Hann tekur á móti öllum upp­lýsingum sem maður kemur með til hans. Sjálf­sagt er það eins hjá Liver­pool og við eigum í ágætis sam­starfi, þjálfara­t­eymi írska lands­liðsins og þjálfara­t­eymi Liver­pool. Vinnum með þeim þegar að svo ber undir. Hann er mataður af upp­lýsingum og hann tekur þær til sín. Við erum að tala um upp­lýsingar er varða til að mynda skot­stíl and­stæðingsins í auka- og víta­spyrnum og öðru slíku. Hann með­tekur þær upp­lýsingar og vinnur með þær eins og hann telur sig þurfa að gera. Við vinnum þetta ekki þannig að við séum að segja honum hvort hann eigi að skutla sér til vinstri eða hægri. Heldur sínum honum mögu­leikana í stöðunni, hvar menn séu lík­legastir til þess að skjóta. Svo er það bara hans að vinna úr því.“

Mikil undirbúningsvinna að baki

Hlut­verk mark­mannsþjálfarans al­mennt í dag sé að vera eins vel undir­búinn og kostur er fyrir leikinn sem fram­u er.

„Öll vikan, dagarnir fram að leik, fara í vinnu út frá því hvernig leikstíl þitt lið spilar eftir og síðan er leikstíll and­stæðingsins einnig grandskoðaður. Við skoðum föst leik­at­riði and­stæðingsins, þar á meðal víta­spyrnur sem hugsan­lega geta komið upp í tví­gang á tíu leikja fresti. En í þessu til­felli hjá Kelleher hafa komið fjórar víta­spyrnur í síðustu fjórum leikjum. Hann ver þrjár af þeim þó svo að ein hafi hrokkið út í teig og hann ekki náð frákastinu. Við sínum mark­mönnunum tölvulíkan yfir það hvar leik­menn eru lík­legir til þess að skjóta úr sínum víta­spyrnum. Hvar þeir hafa skorað, hvernig and­stæðingurinn hefur klikkað á vítum. Þá erum við kannski að miða við fjóra til fimm leik­menn sem eru lík­legastir til að taka víti fyrir sitt lið. Við sýnum þeim líkan yfir þá alla.“

„Það var til dæmis mjög erfitt að vinna þetta í tengslum við Harry Kane, fram­herja enska lands­liðsins, vegna þess að hann er út um allt í sínum vítum og skorar alltaf. Nánast klikkar ekki á víti og er með að ég held í kringum 97-98% nýtingu sem er í raun fárán­legt hjá manni sem hefur tekið um og yfir níutíu víta­spyrnur. Í því til­felli sýndum við Kelleher hvernig Kane skoraði síðast úr víta­spyrnu, aðhlaup hans að boltanum og hvort það gefi til kynna að hann sé lík­legur til að setja boltann í hægra horn, vinstra horn eða beint á markið. Síðan er það bara mark­mannsins að meta. Það er svolítið gaman að þú skulir spyrja um þetta því þegar að Kelleher varði víta­spyrnu á móti Finnum sagðist hann hafa verið heppinn að fara í rétt horn. Hann sagði það sama eftir leikinn með Liver­pool gegn Real Madrid í Meistara­deildinni á dögunum þegar að hann varði spyrnuna frá Mbappé. Þetta er í hans anda en hann er búinn að undir­búa sig fyrir þetta fyrir leikinn. Það er alveg ljóst.“

Boltinn nær ekki að gera árás á hann

En telurðu að Kelleher hafi verið búinn að velja sér horn fyrir leikinn ef sú staða kæmi upp að Mbappé myndi taka víta­spyrnu í honum?

„Ég held ekki. Það er ekki auðvelt að segja já eða nei í þessum efnum en ég held alveg örugg­lega að þetta sé þannig hjá honum að hann velur mómentið. Fyrir þá sem að horfðu á leik Liver­pool og Real Madrid þá gátu þeir séð að hann stóð eins lengi og hann gat. Hann er ótrú­lega glöggur og góður í því að meta það hvort viðkomandi spyrnu­maður sé að fara taka fasta spyrnu eða fara leggja hann. Það ræðst af aðhlaupi leik­mannsins að boltanum. Í leiknum gegn Real Madrid, miðað við það sem ég sá, var Mbappé stressaður. Og auðvitað er þetta stress móment að taka víti því þú ert alltaf dæmdur út frá því hvort þú skorir eða klikkar. Mark­maðurinn er í eins konar bónus hlut­verki. Það er ekki gert ráð fyrir því að hann verji en ef hann ver þá er það mikill bónus. Þetta er ákveðin tækni. Sumir eru betri í þessu en aðrir.“ 

„Ég vil leyfa mér að segja að hann flokkist undir þá sem eru betri í þessu heldur en aðrir. Hann er góður í að lesa leikinn, aðhlaupið, boltann og spyrnuna. Góður í því að standa sem lengst þó hann hafi verið farinn ör­lítið af stað í hornið áður en að Mbappé spyrnir boltanum. En það ber að hafa það í huga að sá sem spyrnir getur leyft sér það í aðhlaupinu að horfa á mark­manninn en þegar að hann sparkar í boltann þá verður hann að vera með augun á boltanum. Annars er hann að taka mikinn séns. Sama gildir í golfi. Kúlan getur farið út um allt ef þú horfir ekki á hana þegar að þú slærð. Um leið og Mbappé horfir á boltann er hann búinn að ákveða sig að skjóta vinstra megin við Kelleher frá mark­manninum séð. Þetta er ákveðin kúnst. Ákveðin tíma­setning og þarna gekk þetta upp hjá Kelleher. Hann varði boltann mjög vel, ekki út í teig heldur til hliðar. Gerði það stór­kost­lega.

Við sjáum að Mbappé horfir í kringum sig. Svo hleypur hann af stað. Vinstri fóturinn fer út hjá Kelleher en hægri fóturinn er eftir á línunni því um leið og boltanum er sparkað á sam­kvæmt reglunni fótur að vera á línunni. Þetta er ákveðin tækni sem Kelleher hefur. Skrefið sem hann tekur út til vinstri er gríðar­lega stórt og hann nær þeirri hreyfingu að gera árás á boltann. Boltinn nær aldrei að gera árás á hann. Ef að boltinn nær að gera árás á mark­manninn þá er mjög lík­legt að hann fari beint út í teig ef hann er varinn. En þegar að mark­maðurinn nær að gera árás á boltann þá nær hann að stýra því hvert boltinn fer. Það er kúnstin. Þennan hæfi­leika hefur hann um­fram marga aðra. Hann er með þennan ótrú­lega hæfi­leika að lesa öll skot mjög vel. Með stað­setningu, ein­beitingu og jafn­vægi sem gerir hann öðru­vísi en marga aðra.“

Myndi gefa honum risa samning

Írska lands­liðið hefur að skipa öflugum mark­mönnum en Kelleher sá mark­maður sem er með kastljósið á sér. Vara­skeifa hjá Liver­pool sem hefur þó sannað sig en miðað við orð þjálfarans Arne Slot í viðtali eftir leikinn gegn Real Madrid mun hann fara aftur á bekkinn er Alis­son snýr aftur úr meiðslum þá er von á nýjum mark­manni eftir tíma­bilið. Írinn er aðeins 26 ára gamall og þarf aðalliðs­bolta.

„Frá mínum bæjar­dyrum séð hefur hann sýnt að hann er mark­maður í hæsta klassa. Hann á að spila í topp­liði. Ef þú getur spilað og skaffað þetta fyrir Liver­pool, þá geturðu skaffað þetta fyrir flest önnur lið í þessum klassa. Hann er topp mark­maður og er búinn að sýna það. Sýndi það í fyrra og árið þar áður í þeim leikjum sem hann fékk. Svo er hann búinn að fá miklu fleiri leiki á yfir­standandi tíma­bili en allir reiknuðu með og hefur sýnt þeim hjá Liver­pool að þeir þurfa ekki að hafa áhyggjur. Hann er bara að spila vel, skaffa stig og vörslur sem gera það að verkum að þú vinnur leikinn með einu marki. 

Svona mark­mann viltu hafa í markinu. Hann er það góður mark­maður að hann þarf að spila. Hvort sem það verður fyrir Liver­pool eða eitt­hvað annað lið verðum við bara að sjá til með. Hann er búinn að segja það sjálfur að hann vill spila og ef hann þarf að fara frá Liver­pool til að gera það þá vill hann fara. En Liver­pool vill örugg­lega ekkert láta hann fara. Ef ég væri þjálfari Liver­pool eða í stjórn félagsins myndi ég endur­nýja samninginn við hann. Ég myndi gefa honum risa samning því hann er hverrar krónu virði og rúm­lega það.