Söfnunarþáttur UNICEF í beinni út­sendingu á þremur stöðvum í einu

Þetta kemur fram í tilkynningu. Þar segir að skemmtiþátturinn Búðu til pláss verði sendur út í beinni útsendingu á stöðvunum þremur í samstarfi við Vodafone og Kviku banka. Sýn, sem á og rekur Stöð 2 og Vodafone, leggur auk þess til höfuðstöðvar sínar undir útsendinguna og símaver Vodafone í þágu málstaðarins. 

„Búðu til pláss í hjartanu þínu, skráðu þig sem Heimsforeldri UNICEF og eigðu ógleymanlega kvöldstund með fjölskyldunni föstudagskvöldið 6. desember klukkan 19:40. íðastliðin tuttugu ár hafa tugþúsundir Íslendinga átt þátt í heimsmeti í að leggja réttindum og velferð milljóna barna um allan heim lið með því að vera Heimsforeldrar UNICEF. Nú sem aldrei fyrr þurfa börn heimsins á stuðningi þínum að halda enda aldrei fleiri börn búið við hörmungar sem þau eiga enga sök á.“

Skemmtikraftar í Kanarí brugðu á leik á sambærilegu söfnunarkvöldi árið 2022.

Stjörnum prýtt skemmtikvöld

Fram kemur að stóru sjónvarpsstöðvarnar þrjár taki allar höndum saman og búi allar til pláss í dagskránni sinni svo áhorfendur geti búið til pláss í hjörtum sínum í þágu barna í neyð. Í þættinum verði boðið upp á úrval skemmtiatriða, grín, dans og tónlist þar sem landsþekktir einstaklingar og velunnarar UNICEF leggi sitt að mörkum í þágu málstaðarins. 

Í þættinum koma meðal annars fram Diljá Pétursdóttir og Björn Stefánsson, dansarar í Ungleikhúsinu og Örn Árnason ásamt Halldóru Geirharðsdóttur, Páli Óskari, Sigríði Thorlacius, Ólafi Darra og Gunnari Hanssyni. Tónlistaratriði kvöldsins verða glæsileg þar sem fram koma meðal annars Pollapönk, Ragga Gísla, Pálmi Gunnarsson, Una Torfa, Unnsteinn Manúel, Rakel Sigurðardóttir, Högni Egilsson, Elín Hall, Daníel Ágúst og Vitringarnir þrír. Kynnar kvöldsins verða Ragnhildur Steinunn Jónsdóttir og Sigrún Ósk Kristjánsdóttir og grínstjórar kvöldsins og kynnar í símaveri Vodafone eru Fannar Sveinsson og Sandra Barilli.

Félagar í Spaugstofunni brugðu á leik í sambærilegum söfnunarþætti árið 2012.

Meginmarkmið kvöldsins verður að fjölga í hópi Heimsforeldra UNICEF, mánaðarlegra styrktaraðila Barnahjálpar Sameinuðu þjóðanna, og munu sjálfboðaliðar í símavera Vodafone taka á móti símtölum verðandi Heimsforeldra allt kvöldið. Segir í tilkynningu að lögð verði áhersla á von og árangur í fjölkrísuheimi og áhorfendum veitt innsýn í störf og verkefni UNICEF um allan heim.

„Sérstök áhersla í þættinum verður á hörmungar barna á Gaza og hvernig þú getur lagt þitt af mörkum til að styðja við börn sem misst hafa allt sitt í stríði sem þau bera enga ábyrgð á. Fyrstu þrír mánuðir af framlögum nýskráðra Heimsforeldra munu þannig renna til neyðarsöfnunar fyrir börn á Gaza.“

Ógleymanleg kvöldstund fyrir alla fjölskylduna

„Við lofum ógleymanlegri kvöldstund í krafti þessa öfluga samstarfs, þar sem við munum í senn slá á létta strengi sem og hjartastrengi þjóðarinnar í þágu réttinda barna,“ segir Birna Þórarinsdóttir, framkvæmdastjóri UNICEF á Íslandi. 

„Tuttugu ára samfylgd og stuðningur Heimsforeldra UNICEF á Íslandi hefur skilað sögulegum árangri í þágu barna um allan heim. Samtakamáttur þjóðarinnar sýnir sig í því að okkar litla þjóð á heimsmet í hlutfallslegum fjölda Heimsforeldra innan UNICEF. Við erum ótrúlega þakklát öllum samstarfsaðilum okkar í þessu risavaxna verkefni sem öll hafa lagst á eitt til að búa til pláss fyrir UNICEF og Heimsforeldra. Nú þegar við fáum svona dýrmætt pláss fyrir skilaboð og erindi UNICEF, biðjum við þjóðina að búa til pláss í hjartanu sínu og skrá sig sem Heimsforeldra. Sýnum í verki að við stöndum með voninni, að við stöndum með réttindum og velferð barna um allan heim, því það hefur aldrei verið mikilvægara.“

Búðu til pláss – fyrir betri heim fyrir börn