Tólf leik­menn komnir til KR

Í gærkvöldi var greint frá því Atli Hrafn Andrason, Eiður Gauti Sæbjörnsson og Vicente Valor hefðu samið við KR. Atli Hrafn og Eiður Gauti komu frá HK og Vicente frá ÍBV.

Alls hafa því tólf nýir leikmenn komið til KR á síðustu vikum. Júlíus Mar Júlíusson, Óliver Dagur Thorlacius og Halldór Snær Georgsson komu frá Fjölni, Matthias Præst frá Fylki, Gabríel Hrannar Eyjólfsson frá Gróttu, Hjalti Sigurðsson frá Leikni, Alexander Helgi Sigurðarson frá Breiðabliki, Jakob Gunnar Sigurðsson frá Völsungi og Róbert Elís Hlynsson frá ÍR.

Fjórir af þessum tólf nýju leikmönnum eru uppaldir hjá KR: Atli Hrafn, Óliver Dagur, Gabríel Hrannar og Hjalti. Þá komu þrír fyrrverandi leikmenn KR til liðsins um mitt sumar: Ástbjörn Þórðarson, Gyrðir Hrafn Guðbrandsson og Guðmundur Andri Tryggvason. Sá síðastnefndi náði þó ekki að spila með liðinu í sumar vegna meiðsla.

Leikmenn sem hafa komið til KR frá því um mitt sumar

Þekkir marga frá fyrri tíð

Atli Hrafn, Óliver Dagur, Gabríel Hrannar, Ástbjörn, Gyrðir og Guðmundur Andri eru fæddir 1999. Þeir Óliver Dagur, Ástbjörn Gyrðir, Guðmundur Andri og Hjalti (fæddur 2000) voru í Íslandsmeistaraliði KR í 2. flokki 2017. Auk þeirra voru Stefán Árni Geirsson og Finnur Tómas Pálmason, núverandi leikmenn KR, í þessu Íslandsmeistaraliði ásamt Tryggva Snæ Geirsson, sem leikur með Fram.

Óskar Hrafn Þorvaldsson, núverandi þjálfari KR, þjálfaði þennan hóp eftir að hann sneri sér aftur að þjálfun eftir feril í fjölmiðlum, þó ekki á Íslandsmeistaraárinu.

Nokkrir leikmenn hafa yfirgefið KR að undanförnu. Má þar nefna Mosfellingana Axel Óskar Andrésson og Eyþór Aron Wöhler. Theodór Elmar Bjarnason, fyrirliði KR, er hættur og þá verður að teljast líklegt að Benóný Breki Andrésson, sem skoraði 21 mark síðasta sumar og sló markametið í efstu deild, haldi í víking.

Einnig hafa orðið breytingar á skrifstofunni hjá KR því Geir Þorsteinsson, fyrrverandi formaður KSÍ, tekur til starfa hjá félaginu sem rekstrarstjóri knattspyrnudeildar um áramótin. Pálmi Rafn Pálmason er framkvæmdastjóri KR en hann er nýtekinn við því starfi af Bjarna Guðjónssyni eftir að hafa gegnt ýmsum störfum hjá félaginu auk þess að spila fyrir það í átta ár.

KR var í miklum vandræðum lengst af síðasta tímabili. Gregg Ryder var látinn fara sem þjálfari liðsins í júní og eftir nokkra leiki með Pálma við stjórnvölinn tók Óskar Hrafn við. KR-ingar hrukku í gang í úrslitakeppninni, unnu síðustu fjóra leiki sína með markatölunni 19-1 og enduðu í 8. sæti. Liðið hefur ekki endað neðar síðan 2007.

Spennandi tímar í vændum

Í Besta sætinu, hlaðvarpi íþróttadeildar Sýnar, sagði Atli Viðar Björnsson að stuðningsmenn KR mættu væru spenntir fyrir næstu skrefum hjá liðinu.

„Ég held að KR-ingar hlakki til og séu spenntir fyrir því sem Óskar ætlar að bjóða þeim upp á næstu árin,“ sagði Atli Viðar.

„Það er nýtt yfirborð á vellinum og mikið af nýjum andlitum að koma inn, mikið af uppöldum KR-ingum, þannig að ég skil vel að KR-ingar séu með vatn í munninum yfir því sem koma skal.“