Coote dómari í enn verri málum

Coote var fyrst settur í bann eftir að myndband fór á flug á netinu þar sem hann talar með afar niðrandi hætti um Liverpool og þáverandi stjóra liðsins, Jürgen Klopp.

Í kvöld birti The Sun síðan myndir af Coote sem virðast sýna hann sjúga hvítt duft upp í nefið með peningaseðli. Coote var þá að vinna sem dómari á Evrópumótinu í sumar.

Breska ríkisútvarpið fékk viðbrögð frá ensku dómarasamtökunum, PGMOL.

„Við vitum af þessum ásökunum og tökum þær mjög alvarlega,“ sagði talsmaður dómarasamtakanna.

„David Coote er áfram í banni og það er full rannsókn í gangi.“

Talsmaðurinn segir að það sé líka verið að hugsa um velferð Coote á þessum tímum og passað upp á það að hann fái nauðsynlegan stuðning.

The Sun segir myndirnar hafi verið sendar til vinar og það hafi hann gert oftar en einu sinni á meðan mótinu stóð.

BBC hefur ekki sannreynt það hvort myndirnar eða myndbandið séu ófalsaðar eða ekki.