Rekstur borgarinnar allur að braggast segir borgar­stjóri

Umræður um fjárhagsáætlun Reykjavíkurborgar fyrir næsta ár og áætlun til næstu fimm ára hófst í borgarstjórn í dag. Hallinn á rekstri A-hluta borgarsjóðs var 15,6 milljaðrar árið 2022 og fimm milljarðar í fyrra.

Einar Þorsteinsson borgarstjóri segir að á þessu ári takist að ná fimm hundruð milljón króna afgangi á rekstri borgarsjóðs og á næsta ári verði 1,7 milljaðra afgangur.

„Stóru tíðindin eru þau að við gerðum plön um að snúa við töluverðum hallarekstri sem er ljós í upphafi kjörtímabils og plönin eru að virka. Þrátt fyrir kröfur um aukna þjónustu, miklar fjárfestingar og erfitt ytra efnahagsumhverfi er okkur að takast að snúa halla í afgang,“ segir borgarstjóri. Þetta ætti bæði við borgarsjóð og borgarsamstæðuna í heild sinni og væri mikill árangur.

Skuldir Reykjavíkurborgar jukust mikið á árunum 2020 til 2023 en hlutfal afborgana af langtímalánum og leiguskuldum hefur batnað töluvert á þessu ári. Í fimm ára áætlun er gert ráð fyrir að borgin greiði meira af lánum en hún tekur af nýjum lánum árið 2028. Borgarstjóri segir skuldir borgarinnar langt innan lögbundinna marka sveitarfélaga.

„Bæði hvað varðar aðalsjóðinn og samstæðuna. Þannig að við stöndum bara ágætlega í öllum samanburði þegar kemur að skuldunum. Líka í getu okkar til að greiða af þessum skuldum. Hún er mjög mikil. Þannig að allir þessir mælikvarðar eru að færast úr rauðu yfir í grænt og það er mikið fagnaðarefni,“ segir Einar.

Á næsta ári og árum verði mikið fjárfest í uppbyggingu leikskóla þar sem plássum verði fjölgað um 700 og átak gert í viðhaldi og uppbyggingu skólabygginga. Þá verði uppbyggingu samgangna haldið áfram og lóðaframboð verði mikið til íbúðabygginga.

Hildur Björnsdóttir oddviti Sjálfstæðismanna í borgarstjórn segir meirihutann hagræða sannleikanum varðandi jákvæða afkomu á þessu ári í áætlunum sínum.

„Það hangir allt á því að Perlan verði seld fyrir fleiri milljarða fyrir árslok. Veruleikinn er hins vegar sá, eins og kom fram hérna inni í borgarstjórnarsalnum áðan, að það er ekki búið að samþykkja neitt kauptilboð í Perluna,“ segir oddviti Sjálfstæðisflokksins.

Þá standist ekki að verulega hafi verið hagrætt í rekstri borgarinnar.

„En þegar betur er að gáð eru útgjöld borgarinnar að vaxa stjórnlaust. Hins vegar streyma tekjurnar hingað inn stríðum straumum. Munar þar mestu um fasteignaskattana. Þeir í rauninni hækka vegna þess að fasteignamat húsnæðis er sífellt að hækka. Við leggjum alltaf til, eins og í dag, að fasteignaskattar verði lækkaðir en því er því miður alltaf hafnað,“ segir Hildur Björnsdóttir.

Dagur B. Eggertsson formaður borgarráðs segir á Facebook síðu sinni í dag að sala á Perlunni væri ekki forsenda fyrir 500 milljóna afgangi í rekstri borgarsjóðs á þessu ári. Perlan hafi verið rekinn í áratugi með tapi upp á tugi og hundruði milljóna. Borgin hafi keypt hana af Orkuveitunni og síðan haft af henni umtalsverðar leigutekjur.

„Þess vegna er komið fram tilboð upp á 3,5 milljarða. Viðræður standa yfir. Það er hins vegar misskilningur - einsog heyrst hefur að niðurtaða ársins velti á sölu Perlunnar. Við gætum meiri varúðar í áætlanagerð en svo og erum með bæði fleiri egg og fleiri körfur,“ sagði Dagur í svari í athugasemd við færslu hans á Facebook í dag.