Á­tök Ás­laugar og Guð­laugs Þórs ekki endur­tekin

Flokkarnir ákveða nú hver á fætur öðrum hvernig best sé að haga málum varðandi lista flokkanna og er viðbúið að fyrirkomulagið verði ólíkt milli kjördæma. Raðað verður á lista Sjálfstæðisflokksins í Suðvesturkjördæmi og allt bendir til þess að hið sama verði uppi á tengingnum í Reykjavík. 

Uppstilling er það fyrirkomulag sem telja má líklegt að verði ofan á í flestum flokkum ef frá eru taldir Píratar sem hafa boðað prófkjör.

Fáir möguleikar í boði

Albert Guðmundsson er formaður Varðar, fulltrúa- og kjördæmaráðsins í Reykjavík.

„Við tókum okkur daginn í gær að fara yfir stöðuna af yfirvegun. Svo verður stjórnarfundur í kjördæmisráðinu í kvöld. Síðan verður væntanlega boðað til fulltrúaráðsfundar þar sem aðferð við val á lista verður staðfest,“ segir Albert.

Miðað við tímalínuna séu fáir möguleikar í boði, raunar tveir. Útséð sé að prófkjör náist ekki á svo skömmum tíma. Því standi til boða uppstilling eða svokallað tvöfalt kjördæmisþing sem flokkurinn hafi aðallega notað á landsbyggðinni og ekki er hefð fyrir í Reykjavík.

„Við munum vega og meta þá kosti sem munu skila okkur sem sterkustum og samheldnustum listum,“ segir Albert. Hann segist ekki vita betur en allir sem skipuðu efstu sæti lista flokksins í kosningunum 2021 gefi áfram kost á sér.

Hart barist

„Þeir töpuðu!“ sagði Guðlaugur Þór í sigurvímu þegar ljóst varð að hann hafði sigrað Áslaugu Örnu með 3508 atkvæðum gegn 3326 atkvæðum hennar. Munurinn var því innan við tvö hundruð atkvæði.

Í sigurræðu Guðlaugs Þórs með stuðningsmönnum sagði Guðlaugur við stuðningsmenn sína að markvisst hefði verið unnið gegn honum sem oddvita flokksins. Hann hrósaði um leið innilega sigri yfir því að andstæðingar hans hafi ekki haft erindi sem erfiði.

„Þið skulið alveg átta ykkur á því að við höfum kannski haldið að þetta væri tiltölulega einfalt að því leytinu til að sá sem hér stendur hefur mælst vinsælasti ráðherra Sjálfstæðisflokksins, eini Sjálfstæðismaðurinn sem hefur unnið erfiðasta kjördæmi okkar, Reykjavík norður, ekki einu sinni, heldur þrisvar.

Samt sem áður var lögð einhver gríðarlega mikil áhersla á það að sjá til þess að sá sem hér stendur, og það er ekki bara ég, heldur þið, myndi ekki fá að vera áfram oddviti. Þið sáuð til þess að allir þeir sem unnu gegn því, að þeir töpuðu,“ sagði Guðlaugur.