Vill að Menendez bræðrum verði veitt frelsi

Kastljósið hefur beinst að sögu bræðranna að nýju vegna leikinnar þáttaraðar úr smiðju Netflix, Monsters: The Lyle and Erik Menendez Story. Bræðurnir myrtu foreldra sína á heimili þeirra með haglabyssum árið 1989. Þeir voru dæmdir í ævilangt fangelsi árið 1996 en höfðu haldið því fram að foreldrar þeirra hefðu misnotað þá um árabil.

„Við erum öll afsprengi lífsreynslu okkar. Hún mótar það hver við erum og hver við verðum. Líkamlega og andlega breytir tíminn okkur og ég efast um að nokkur maður myndi halda því fram að hann sé sami maður og hann var þegar hann var átján ára. Ég veit að ég myndi ekki gera það!“ skrifar Kardashian í opnu bréfi sínu sem birt er á vef NBC sjónvarpsstöðvarinnar.

Bræðurnir séu fyrirmyndarborgarar

Ástæður þess að Kim opnar sig um mál þeirra eru þær að undanfarin ár hefur hún lagt lögfræði fyrir sig. Þá hefur hún veitt málefnum fanga æ meiri athygli og vakið athygli á bágborinni stöðu þeirra og vakið athygli á málum hinna ýmsu fanga sem meðal annars hafa verið dæmdir til dauða.

Bræðurnir voru dæmdir í ævilangt fangelsi án möguleika á reynslulausn á sínum tíma. Þeir voru 21 árs og 18 ára gamlir. Kim segist hafa hitt þá nokkrum sinnum í fangelsi, ljóst sé að þeir séu breyttir menn. Þeir séu í dag fyrirmyndarborgarar, hafi báðir gengið menntaveginn og snúið við blaðinu.

„Eins og oft er málið er þessi saga miklu flóknari en hún lítur út fyrir að vera. Báðir bræður hafa lýst kynferðislegu, líkamlegu og andlegu ofbeldi af hálfu foreldra sinna sem þeir hafi verið beittir í áraraðir. Samkvæmt Lyle hófst misnotkunin þegar hann var einungis sex ára gamall og Erik segir að sér hafi verið nauðgað af föður sínum í meira en áratug. Eftir áraraðir af misnotkun og ótta um líf sitt völdu Erik og Lyle það sem þeir héldu að væri þeirra eina leið út úr þessum aðstæðum, hræðilega leið til þess að sleppa úr þessari lifandi martröð.“

Nýjar vísbendingar gætu haft áhrif

Í pistli sínum fer athafnakonan jafnframt yfir sögu réttarhaldanna yfir bræðrunum. Réttað var yfir bræðrunum í tvígang eftir að kviðdómendur gátu ekki komið sér saman um niðurstöðu í fyrsta skiptið. Kim bendir á að í síðari réttarhöldunum hafi dómari komið í veg fyrir að sönnunargögn um meinta misnotkun bræðranna yrðu lögð fyrir dóminn.

Áður hefur komið fram að bræðurnir muni verða kallaðir fyrir dómara í nóvember. Er það vegna nýrra sönnunargagna um að faðir þeirra hafi misnotað þá. Gæti svo farið að réttað yrði yfir þeim að nýju eða dómi þeirra breytt.

„Ég hef eytt tíma með Lyle og Erik, þeir eru ekki skrímsli. Þeir eru hlýir, gáfaðir og heiðarlegir menn,“ skrifar Kardashian um bræðurna. Hún segir þá hafa verið duglega að gefa af sér í fangelsi, meðal annars aðstoðað aðra fanga að feta menntaveginn.

„Þegar ég heimsótti þá í fangelsi fyrir þremur vikum sagði einn fangavörðurinn mér að hann væri til í að hafa bræðurna sem nágranna sína. Tuttugu og fjórir fjölskyldumeðlimir, þar á meðal systkini foreldra þeirra hafa veitt þeim allan sinn stuðning og beðið um að þeim verði sleppt úr haldi.“