Standandi lófa­klapp fyrir Ljós­broti í Toronto

Auk Ljósbrots var einnig sýnd myndin O (Hringur) eftir Rúnar. Eftir mikil fagnaðarlæti og lófaklapp í lok sýningar, sátu Heather Millard framleiðandi og Rúnar leikstjóri fyrir svörum frá áhorfendum, sem spurðu tvíeykið um gerð myndarinnar. Allar sýningar á myndunum tveimur eru uppseldar á hátíðinni.

„Það er gaman að við séum komin vestur um haf að sýna myndirnar okkar. Hérna tekur við nýr og spennandi kafli. Þegar hefur verið lagður góður grunnur fyrir báðar myndir þegar kemur að þáttöku og keppni á kvikmyndahátíðum hérna í álfunni,“ er haft eftir Rúnari í tilkynningunni. „Vonum við auðvitað að myndirnar eiga sama láni að fagna hérna eins og annars staðar sem myndirnar hafa farið. Svo erum við erum á lokametrunum að loka dreifingarsamningi fyrir Norður Ameríku þannig að það eru spennadi tímar framundan.“

Sýndar saman á hátíðinni

Jason Anderson einn af dagskrárstjórum TIFF kynnti myndirnar og sagði meðal annars að þó að myndirnar séu í ólíkum flokkum að þá eru þær sýndar saman vegna hinar óvenjulegu stöðu að einn og sami leikstjórinn sé með kvikmynd og stuttmynd á hátíðinni.

Ljósbrot gerist á fallegum vordegi þegar líf Unu snýst á hliðina á svipstundu og upphefst rússibanaferð tilfinninga. Þar sem mörkin milli hláturs og gráturs, fegurðar og sorgar, verða stundum óskýr. Með aðalhlutverk fara, Elín Hall, Katla Njálsdóttir, Mikael Kaaber, Baldur Einarsson, Gunnar Kristjánsson og Ágúst Wigum.

Fram kemur í tilkynningu að um Ljósbrot hafi Jason meðal annars sagt: „Elín Hall festir sig í sessi sem einn af mest sannfærandi ungu leikarum evrópskra kvikmynda með undraverðri og djúpstæðri frammistöðu. En saman með henni er leikarahópur sem er jafn óttalaus, sem og leikstjóri sem getur lagt áherslu á gildi ástar og tengsla sem og sýnt hvernig þau geta myndast á myrkustu augnablikum sorgarinnar.“

O (Hringur) með Ingvari Sigurðssyni kallaði Jason „áhrifamikila rannsókn á breyskleika mannsins sem sé borin uppi af mögnuðum leik Ingvars Sigurðssonar.“ Stuttmyndin er ljóðræn frásögn af manni sem vill standa sig en hans helsta hindrun er hann sjálfur. Stuttmyndin var heimsfrumsýnd fyrir viku síðan á alþjóðlegu kvikmyndahátíðinni í Feneyjum og í Toronto er myndin í keppni um aðalverðlaunin í sínum flokki, sem veita sjálkrafa rétt að forvali fyrir Óskarsverðlaunin 2025 en Rúnar var einmitt tilnefndur til þeirra árið 2006 fyrir Síðasta Bæinn.