Yazan bíður enn svara

Yazan kom með foreldrum sínum Mohsen og feryal Aburajab Tamimi hingað til lands frá Palestínu fyrir ári síðan. Þau komu til Íslands í gegnum Spán, þar sem þau fengu vegabréfsáritun. Stefnan var alltaf til Íslands, vegna þeirrar góðu þjónustu sem fötluð börn fá. Nú á að senda fjölskylduna aftur til Spánar vegna Dyflinarreglugerðarinnar.

Albert Lúðvígsson, lögmaður fjölskyldunnar, hefur óskað eftir því að kærunefnd Útlendingamála taki málið aftur upp. Nauðsynleg gögn um áhrif brottflutnings á heilsu Yazans voru ekki lögð fyrir í málinu þegar það var fyrst tekið fyrir.

„Því miður hefur staðan ekkert breyst. Þau bíða enn eftir skilaboðum frá lögreglu um hvenær fjölskyldan verður flutt úr landi. Kærunefnd útlendingamála er að skoða endurupptökubeiðni sem ég hef sent þeim en ekki úrskurðað í málinu ennþá,“ segir Albert.

 Yazan er með hrörnunarsjúkdóminn Duchenne og missti níu ára gamall getu til göngu. Feryal, móðir hans, lýsti því í viðtali í kvöldfréttum Stöðvar 2 á dögunum að Yazan hraki mjög hratt fái hann ekki þjónustu sjúkraþjálfara og lækna. Sjúkdómurinn er ólæknandi en hægt er að halda honum í skefjum með meðferð.

Fram kemur í læknisvottorði, sem fréttastofa hefur undir höndum, að verði rof á þjónustu við Yazan geti það verið lífshættulegt og stytt ævi hans. Um 30% drengja með þennan sjúkdóm deyi í kjölfar falls og líklegt sé að fjölskyldan þyrfti að bera sjálf kostnað af kaupum á hjólastól verði hann sendur til Spánar.

„Þessi óvissa er satt best að segja óbærileg, sérstaklega í ljósi þess að læknar eru sammála um það að verði rof á þjónustunni eða hún skert að einhverju leyti hafi það neikvæðar afleiðingar fyrir heilsu Yazans, bæði líkamlega og andlega.“

Þá hafa Duchenne-samtökin, Landssamtökin Þroskahjálp, Öryrkjabandalag Íslands og samtök Einstakra barna mótmælt brottrekstrinum harðlega.

„Ég hef sjaldan séð jafn afgerandi læknavottorð eins og í þessu máli hans Yazans um nauðsyn þess að hann fái að dvelja á Íslandi. Svo hafa yfirlýsingar Þroskahjálpar, ÖBÍ, Einstakra barna og Duchenne-samtakanna verið mjög afgerandi og einróma líka. Þetta er mjög sérstakt mál, ég vona heitt og innilega að hann fái að vera á Íslandi,“ segir Albert.

Hann segir alls óvíst hve langan tíma kærunefnd gefi sér til að afgreiða málið.

„Það fer eftir aðstæðum hvers máls og málavöxtum. Ég viðurkenni það fúslega að það er mikið álag á nefndinni núna. Það er engin sérstök regla til um það.“