Kemur beint frá París með vistvæna tísku­strauma

Ása Bríet kemur frá Íslandi og Færeyjum og tekur þátt í viðburðinum Young Talents of FashionDesign á HönnunarMars. Viðburðurinn opnar 24. apríl í Landsbankanum.

Grunnnám í London og meistaranám í París

Ása Bríet hefur komið víða að og meðal annars verið búsett í London og París.

„Ég útskrifaðist með sveinspróf í kjólasaum frá Tækniskólanum í Reykjavík árið 2016 og hélt þaðan beint áfram í Myndlistaskólann í Reykjavík í grunnnám í textíl.“ 

Hún fluttist síðan til London árið 2019 og lagði stund á fatahönnun við Central Saint Martins. 

„Ég útskrifaðist þaðan árið 2023 með BA í kvennafatnaði eða Womenswear. Í dag stunda ég meistaranám í fatahönnun með sérhæfingu í prjóni í París við Institut Français de la Mode. 

Ég hef aflað mér framúrskarandi tæknilegrar og skapandi þekkingar á ólíku handverki til þess að dýpka þekkingu mína í því fagi sem ég hef ástríðu fyrir, fatahönnun.

Á HönnunarMars er ég svo að taka þátt í samsýningu í samstarfi með Landsbankanum ásamt sex öðrum hæfileikaríkum og upprennandi fatahönnuðum.“

Handverk fortíðarinnar á nýstárlegan máta

Ása Bríet kemur til með að sýna tvær flíkur úr útskrifarverkefni sínu frá Central Saint Martins.

„Með útskriftarlínu minni er ég að rannsaka handverk fortíðarinnar og koma henni í nútíð þar sem ég nálgast aðferðir í textíl- og í sníðagerð á nýstárlegan máta.

Markmið mitt er að geta fært reynsluna mína inn í framtíðina með von um betri og sjálfbærari leiðir til að búa til klæðnað. Það eru gæði í þeim tímaleysishreyfingum sem handverkið gefur manni og ég veiti huganum og umhverfinu athygli.“

Báðar flíkurnar sem Ása Bríet sýnir í Landsbankanum eru skúlptúrar. Innblásturinn sækir hún í gamlar minningar frá Færeyjum. 

„Amma mín í Færeyjum er með rosalega fallegan blómagarð, ég á þessa minningu um að koma heim seint um kvöld þar sem að blómin hurfu öll inn í kolniðamyrkrið. 

Með fíngerðum svörtum penna byrjaði ég að endurframkalla þessa mynd sem ég sá af garðinum með línuteikningu. Teikningin varð að endalausri línu í formi blóma.

Skúlptúrinn er gerður úr bambus prikum sem ég vafði saman með silki og ullarbandi og þræddi saman í sitt form. Ég saumaði svo út hvert einasta blóm með silkiþræði á uppleysanlegt efni.“

Flíkur sem skúlptúrar og gjörningur

Önnur flíkin sem verður til sýnis á gjörningi mun fara fram á milli klukkan 17:00 og 19:00 laugardaginn 27. apríl í Landsbankahúsinu.

„Það er pils sem er gert úr 500 þráðum. Kljásteinavefstól veitti mér innblástur en frá upphafi vestrænna sögu og fram á miðaldir var sú tegund vefstóla notuð. Þræðirnir eru þræddir í kringum krínólín og festir í leirsteina sem ég handmótaði sjálf.

Jakkinn er í formi íslenska skautbúningsins, ofinn í spillilausa (e. zero-waste) vefnaðartækni þar sem ég vef jakkann inn í sitt snið. Efnið er úr silki, rifið niður og ég leyfi vefnaði efnisins að losna frá uppistöðu sinni.“

Sömuleiðis verður Ása Bríet með flíkur úr útskrifarlínu sinni til sýnis á samsýningunni Innsýni sem er haldin í Reykjastræti 6 á Hafnartorgi.

„Ég er ótrúlega spennt að koma til landsins og fá að sýna handverkið mitt á HönnunarMars. Einnig er ég mjög spennt að hitta og kynnast hinum hönnuðunum sem munu sýna með mér. 

Við komum öll úr mismunandi áttum og með ólíka nálgun á fatahönnun sem verður mjög gaman að sjá saman á sýningu.“

HönnunarMars hefst næstkomandi miðvikudag en hér má nálgast dagskrána í heild sinni.