Rauf skil­orð með ræktun og akstri í Lág­múla

Í ákæru kemur fram að lögregla hafi stöðvað manninn þar sem hann ók bíl án ökuréttinda um Lágmúla í Reykjavík í lok apríl 2022. Þá var hann ákærður fyrir að hafa haft í vörslum sínum sextíu kannabisplöntur og hafa um nokkurt skeið ræktað plönturnar. Hann er talinn hafa ræktað þær í sölu- og dreifingarskyni.

Maðurinn játaði brot sín skýlaust. Hann á að baki sakaferil sem nær aftur til ársins 1995 og hefur sex sinnum áður verið gerð refsing fyrir að aka sviptur ökuréttindum.

Hann hafði síðast verið dæmdur í tuttugu mánaða fangelsi með dómi árið 2019, meðal annars fyrir að hafa ekið sviptur ökuréttindum og fyrir fíkniefnalagabrot. Honum hafði svo verið veitt reynslulausn á haustmánuðum 2020 og gerðist hann með brotum sínum nú sekur um að hafa rofið skilorð.

Við ákvörðun refsingar var litið til þess að hann játaði brot sín skýlaust, að hann hafi hafið áfengis- og vímuefnameðferð og að tafir hafi orðið á meðferð málsins. Var hæfileg refsing ákveðin 22 mánaða fangelsi.

Búnaður sem notaður var við ræktun plantnanna – meðal annars fimm viftur, ellefu straumbreytar, ellefu lampar, fjórir LED lampar, vatnsdælur og fleira – var gerður upptækur. 

Manninum var jafnframt gert að greiða tæpa hálfa milljón króna vegna málsvarnarþóknunar til skipaðs verjanda og annan sakarkostnað.