„Verður erfitt sumar fyrir Böðvar vin minn“

„Þeir voru betri í fyrri hálfleik og voru að spila boltanum á milli sín en fengu ekki mörg færi. Mér fannst við skapa nokkrar góðar stöður á vellinum. Við settum pressu á þá í seinni hálfleik en náðum ekki að reka endahnútinn á það,“ sagði Björn Daníel Sverrisson í samtali við Vísi eftir leik.

Björn Daníel var ekki sáttur með að FH hafi ekki fengið vítaspyrnu þegar Damir Muminovic tók Sigurð Bjart Hallsson niður í teignum.

„Að mínu mati var tekið víti af okkur. Við vorum einu marki undir á þeim tíma og það hefði breytt leiknum mikið. Ég veit ekki hvernig hann sá þetta ekki þar sem hann var fimm metra frá þessu en svona er þetta.“

„Ég er búinn að horfa á þetta atvik inn í klefa og mér finnst þetta hundrað prósent víti. Þetta gerist hratt og vonandi lifa menn og læra af þessu.“

Mikil umræða hefur skapast um breyttar áherslur dómara þar sem gulum spjöldum hefur fjölgað töluvert. Björn hafði þá sérstaklega miklar áhyggjur af Böðvari Böðvarssyni.

„Það er erfitt fyrir marga að halda aftur af sér þegar þeir eru ósáttir með eitthvað. Þetta verður erfitt sumar fyrir Böðvar vin minn ef að hann fær alltaf gult spjald þegar hann er ósáttur út í dómarann. Þá held ég að hann verði í banni í fleiri leikjum heldur en hann spilar.“

„Það eru alltaf nýjar áherslur og menn verða að læra að fylgja þeim. Það er stutt þangað til að ég hætti og þetta verður orðið allt of flókið þegar að ég hætti,“ sagði Björn Daníel Sverrisson að lokum.