Mun leiða arki­tekta­stofuna Arkitema á Ís­landi

Frá þessu segir í tilkynningu. Þar kemur fram að Hallgrímur Þór sé mörgum kunnur innan Arkitema enda hafi hann starfað þar í ellefu ár, bæði í Árósum og í Kaupmannahöfn, áður en hann hélt til Nordic Office of Architecture í Noregi.

„Á síðustu árum hefur hann starfað hjá Nordic á Íslandi. Hallgrímur hefur komið að mörgum spennandi verkefnum hér á landi sem og erlendis og má þar nefna hönnun á stækkun Keflavíkurflugvallar og hönnun á Menningarhúsinu Hofi á Akureyri sem opnaði árið 2010, en það síðarnefnda var unnið af Nordic, þá Arkþing, í samstarfi við Arkitema.

Hallgrímur hefur nú starfað á Íslandi undanfarin fimm ár og hefur mikla þekkingu á byggingariðnaðinum almennt sem hann telur að muni gagnast við uppbyggingu nýrrar skrifstofu Arkitema hér á landi.“

Arkitema hefur verið í eigu COWI frá árinu 2018, en í lok maí síðastliðinn keypti COWI ráðgjafar- og verkfræðifyrirtækið Mannvit. Segir að margir viðskiptavinir sjái tækifæri í því að þjónusta arkitekta og verkfræðinga sé á sömu hendi og að ráðgjafar svari þannig kröfu um samþætta þjónustu og aukna áherslu á sjálfbærar lausnir. Því hafi þótt eðlilegt skref að Arkitema setti á laggirnar skrifstofu hér á landi.

Skrifstofa Arkitema á Íslandi opnaði formlega 2. apríl í höfuðstöðvum COWI á Íslandi og er þar með níunda útibúið á Norðurlöndunum.