Innlent

Slokknað í syðsta og minnsta gígnum en enn mikil virkni

Lovísa Arnardóttir skrifar
Enn er mikil virkni í tveimur gígum.
Enn er mikil virkni í tveimur gígum. Vísir/Vilhelm

Útlit er fyrir að slokknað sé í syðsta gígnum í eldgosinu við Sundhnúksgígaröðina. Það er sá minnsti. Góð og mikil virkni er þó í hinum tveimur gígunum og sérstaklega í öðrum þeirra, sem er stærstur.

„Virknin í hinum gígunum er nokkuð jöfn. Annar er stærri og góð virkni í honum,“ segir Salóme Jórunn Bernharðsdóttir náttúruvársérfræðingur á Veðurstofu Íslands.

Hún segir að hraunáin renni enn til suðurs. Hraunið bunki sig reglulega upp og svo komi smá framhlaup. „En það er ekkert sem ógnar. Það er smá bunki núna að myndast við Hagafell og það gæti hlaupið fram úr því en það virðist ekki ná neinu eins og er,“ segir Salóme.

350 metrar í Grindavíkurveg

Hún segir næstu innviði varnargarðana fyrir sunnan og svo sé Melhólsnáma sem hraun hafi runnið ofan í síðustu daga. Um 350 metrar eru svo í Grindavíkurveg en færi hraunið þangað segir Salóme að það myndi líklega renna yfir þann hluta vegarins sem er í lítilli notkun.

„Það er búið að stýra mestri umferð um Norðurljósaveg núna.“

Hraun hefur runnið í Melhólsnámu en þangað hefur efni verið sótt í varnargarðana. Vísir/Vilhelm

Hvarð varðar gasmengun segir hún ekki mikla gasmengun hafa mælst í nótt en að einhver mengun hafi mælst vegna gróðurelda sem hafi geisað á svæðinu. Í færslu á Facebook-síðu Veðurstofunnar í gær kom fram að á svæðinu sé viðvarandi norðaustanátt. Gasmengun berist því undan vindi til suðvestur. Brennisteinsdíoxíð gildi mældust há við Nesveg norðar við Grindavík og fóru upp í viðvörunargildi.

„Það má samt alltaf gera ráð fyrir að það sé mengun á svæðinu en hún mælist ekki endilega því það er hvasst á svæðinu og þegar það er norðaustanátt þá beinir það gasinu í suðvesturátt.“

Ekkert landris

Salóme segir að eins og stendur mælist ekki landris. Það sé líklega vegna þess að opið sé í gegn og hraunið enn að renna út.

„Það var bara fyrstu dagana, í byrjun síðustu viku, en svo hefur ekkert landris mælst. Það er ekki að safnast fyrir í Svartsengi því það er enginn söfnunarstaður á leiðinni “.

Eldgos og jarðhræringar Grindavík Eldgos á Reykjanesskaga Gróðureldar á Íslandi

Tengdar fréttir

Sennilega þeir einu sem vilja rigningu um páskana

Eldgosið norðan Grindavíkur mallar enn eins og það hefur gert síðustu daga. Mikill þurrkur er á svæðinu svo kviknað hefur í gróðri á gosstöðvunum. Slökkviliðsmenn í Grindavík eru sennilega í minnihluta fólks sem vill að það rigni um páskana.

Náðu tökum á gróður­eldum við gos­stöðvar í gær

Slökkviliðsmenn náðu að slökkva í gróðureldum sem blossuðu upp við gosstöðvarnar í gær. Slökkvilið frá Grindavík, Suðurnesjum og Árnessýslu voru við störf og verður áfram viðvera í dag. Mjög þurrt er á svæðinu og engin rigning í kortunum. 

„Reynum allt til að missa þetta ekki í sömu stærð“

Slökkvilið Grindavíkur gerir nú hvað það getur til að koma í veg fyrir að gróðureldar við gosstöðvarnar á Reykjanesskaga breiði úr sér og verði jafn stórir og þeir urðu í gosinu í júlí á síðasta ári. Hjálpin kemur víða að.

Út­lit fyrir að gasmengun berist til vesturs og suð­vesturs

Enn er hætta á gasmengun og er útlit fyrir að mengunin berist til vesturs og suðvesturs í dag, meðal annars yfir Svartsengi, Hafnir og Grindavík. Huga þarf að loftgæðum. Virkni eldgossins er enn stöðug og hefur verið þar frá mánudegi. Enn mælist landris en það er hægara en áður.

Hættuleg gasmengun kemur í veg fyrir opnun Bláa lónsins

Bláa lónið hefur samtals verið lokað í rúmlega áttatíu daga frá því að jarðhræringarnar við Grindavík hófust fyrir fimm mánuðum. Óvíst er hvenær hægt verður að opna á ný vegna hættulegrar gasmengunnar.

Mest lesið


Fleiri fréttir

Sjá meira


×

Mest lesið