Gefur lítið fyrir mögu­lega dóms­átt í máli Banda­ríkjanna gegn Ass­an­ge

Frá þessu greinir Wall Street Journal en í umfjöllun miðilsins segir meðal annars að yrði þetta niðurstaðan yrði Assange mögulega látinn laus úr fangelsi á Bretlandseyjum, þar sem hann var handtekinn árið 2019. 

Áður en hann var handtekinn hafði Assange dvalið í sendiráði Ekvador í Lundúnum í 2.487 daga.

Samkvæmt umfjöllun WSJ hafa fulltrúar dómsmálayfirvalda vestanhafs og lögmenn Assange átt í viðræðum á síðustu mánuðum um mögulega sátt. Miðillinn gerir því skóna að menn séu farnir að sjá fram á að Assange myndi hvort eð er ekki verða dæmdur í mikið lengra fangelsi en sem nemur varðhaldinu sem hann hefur nú þegar mátt sæta.

WSJ segir viðræðurnar hins vegar á viðkvæmu stigi og hefur eftir Barry Pollack, einum lögmanna Assange, að hann hafi ekkert í höndunum sem bendi til þess að yfirvöld í Bandaríkjunum vilji ná sáttum.

Vísir leitaði viðbragða hjá Kristni Hrafnssyni, ritstjóra Wikileaks, sem sagði fátt um málið að segja og kallaði frétt WSJ „vangaveltur“. Þá hafði hann eftir Pollack að það væri ekki við hæfi að lögmenn Assange tjáðu sig um málið á meðan beðið væri niðurstöðu yfirdómstóls á Bretlandi um framsal hans til Bandaríkjanna.

Ekkert benti til annars en að stjórnvöld í Bandaríkjunum væru staðráðin að fá Assange framseldan á grundvelli allra ákæruliða, sem gætu endað með 175 ára fangelsisdómi.

„De facto dauðadómur“

Wall Street Journal minnist á það í frétt sinni að yrði Assange framseldur til Bandaríkjanna og dæmdur þar, hefðu þarlend yfirvöld heitið því að honum yrði leyft að afplána dóminn í heimalandi sínu, Ástralíu. Ef þannig færi væru töluverðar líkur á að dómurinn yrði mildaður og honum sleppt.

Kristinn segir þetta loforð Bandaríkjamanna hins vegar aðeins mótspil þeirra til að styrkja framsalskröfuna fyrir dómstólum á Bretlandi. Þá sé viðbúið að Assange muni þurfa að dúsa í fangelsi í Bandaríkjunum í tvö til þrjú ár á meðan hann bíður dóms.

„Það eru allar vísbendingar um að sú vistun verði í algerri einangrun (lokaður inni í klefa í 23 klst á sólarhring með einn klukkutíma fyrir utan og þá einn). Slík meðferð er mögulegur „dauðadómur“ samkvæmt mati dómkvaddra lækna. Í þriðja lagi sýna fordæmi að það er hægt að taka upp ný mál við refsiákvörðun - mál sem ekki hefur verið ákært fyrir, og flétta inn í refsinguna (nýlegt dæmi er Joshua Schulte).

Allt þetta gefur okkur tilefni til að tala um de facto dauðadóm sem hætta er á ef kemur til framsals,“ segir Kristinn í skriflegum svörum við fyrirspurn fréttastofu.

Von er á niðurstöðu yfirréttar í Lundúnum um framsal Assange til Bandaríkjanna á næstu vikum. Um er að ræða síðasta úrræðið sem hann hefur til að áfrýja framsalskröfunni innan breska dómskerfisins.