Halda fullum launum í fæðingar­or­lofi

Þetta kemur fram í tilkynningu frá COWI. Þar segir að með samruna fyrirtækjanna verði auðveldara að nýta samlegðaráhrif, sveigjanleiki verði aukinn sem og aðgengi að sérfræðingum COWI sem telja um átta þúsund einstaklinga víða um heim, að meðtöldum 280 Mannvitsmönnum sem nú verða starfsmenn COWI.

„Samruninn þýðir að COWI getur nú boðið íslenskum viðskiptavinum sínum aukna þjónustu, sérfræðiþekkingu sem og aukinn mannskap til að vinna verkefni frá frumhugmynd til verkloka,“ segir í tilkynningunni.

Á næstu árum áformi COWI að auka starfsemi og umsvif sín á Íslandi með áherslu á helstu styrkleika sína í innviðum, iðnaði, umhverfismálum og endurnýjanlegri orku.

„Þessi aukning mun byggja á fjölbreyttum verkefnagrunni, meðal annars á þróun vindorku, á sviði rafeldsneytis, jarðvarmaverkefna og stærri verkefna á mannvirkjasviði. Takmarkið er að auðvelda enn frekar samstarfið við íslenska viðskiptavini sem snýr meðal annars að þróun miðstöðvar grænna orkuverkefna fyrir ýmsar atvinnugreinar og á þann hátt skapa lausnir í sameiningu.“

Nú þegar nafn og vörumerki breytist komi COWI til með að setja af stað herferð á Íslandi í því skyni að ráða fleiri sérfræðinga til starfa sem er hluti af fyrirhugaðri stækkun á íslenska markaðnum.

„Samhliða breytingu vörumerkisins verða kynntar nýjungar fyrir starfsfólk. Má þar nefna aukin réttindi starfsfólks í fæðingarorlofi. COWI er þar með fyrsta verkfræðistofan á Íslandi sem býður starfsfólki í fullu starfi sex mánaða fæðingarorlof með uppbótargreiðslum sem samsvara fullum launum.“

Á Íslandi er 600 þúsund króna hámark á mánaðarlegar greiðslur í sex mánaða fæðingarorlofi.

Örn Guðmundsson, framkvæmdastjóri COWI á Íslandi, segir vera þörf fyrir fleira starfsfólk í tengslum við verkefnin sem framundan eru.

„Á árinu er útlit fyrir spennandi verkefni hér á landi, til dæmis gegnum við lykilhlutverki við byggingu nýja Landsspítalans, uppbygging Borgarlínunnar heldur áfram auk ýmissa verkefna tengdum vatnsaflsvirkjunum. Það skiptir höfuðmáli að þekkingin sé til staðar til að þjónusta jarðhita- og vatnsaflsverkefni og raforkuflutning. Einnig er vaxandi eftirspurn eftir þjónustu sem tengist vindorku og landeldi. Þetta þýðir að við viljum fá fleiri sérfræðinga í lið með okkur og búast má við að við auglýsum nýjar stöður á næstu mánuðum,“ segir Örn.

COWI er alþjóðlegt ráðgjafarfyrirtæki með höfuðstöðvar í Danmörku og yfir átta þúsund starfsmenn sem vinna að um tíu þúsund verkefnum að staðaldri víða um heim.

„Í samvinnu við viðskiptavini COWI er unnið að því að móta þjónustu og lausnir á sviði sjálfbærni sem bæta lífsgæði fólks og komandi kynslóða. Þjónustusviðið nær yfir verkfræði, arkitektúr, orku og umhverfismál. COWI hefur sterka stöðu á Norðurlöndunum, í Bretlandi, Norður-Ameríku og Indlandi auk starfsemi í yfir 35 löndum sem eykur sveigjanleika og stuðning við viðskiptavini til að ná sjálfbærnimarkmiðum sínum.“