Brotnir verk­takar fari grjótharðir á­fram á hnefanum

Greint var frá því í morgun heitt vatn væri komið á vestari hluta bæjarins og að almannavarnir hafi óskað þess að Grindvíkingar sem búi vestan Víkurbrautar skiluðu til þeirra lyklum að húsum sínum svo hægt væri að kanna ástand hitakerfa fasteigna.

Fréttamaður skellti sér í húsnæði Brunavarna Suðurnesja í Reykjanesbæ, sem almannavarnir nota þessa dagana, og tók íbúa tali þegar þeir skiluðu lyklum.

Þurfti ekki að afhenda lykla af því hann skildi eftir opið

Geir Guðmundsson er einn þeirra íbúa sem mætti í húsnæði almannavarna. Hann kvaðst vera þar í þeim erindagjörðum að veita skriflegt leyfi fyrir því að farið yrði inn á heimili hans í Grindavík.

Hann segist varla hafa sofið í nótt vegna áhyggja af því að heimili hans lægi undir skemmdum vegna skorts á heitu vatni. Því fagni hann því að einhver geti farið inn í húsið að athuga með skemmdir þó að hann megi það ekki.

Hann kveðst ekki vita nákvæmlega hvernig fyrirkomulagið verði, hann hafi skrifað undir leyfi og voni nú það besta.

Varstu þá að afhenda lykla?

„Nei, ég gerði það nú ekki. Ég skildi bara eftir opið, það er enginn að snuðra þarna. Nema kannski RÚV, það gæti verið.“

Þakklát en væri alveg til í fara sjálf

Guðný Sigurðardóttir fór með lykla að heimili föður hennar til viðbragðsaðila. Henni þykir ekkert tiltökumál að afhenda ókunnugu fólki lyklana.

„Ég treysti þessu fólki, það er að gera þetta fyrir okkur. Við megum ekki fara, þó að við værum alveg til í gera það.“

Hún segist hafa haft áhyggjur af húsinu sínu á hverjum einasta degi undanfarið, hvað sem líður eldgosinu sem hófst á sunnudag. Húsið hennar standi enn en hún hafi ekki hugmynd um það hvernig umhorfs er innandyra. „Hvort allt sé brotið og bramlað. Við tökum bara á því þegar það kemur að því.“

Guðný segir að hún sé dofin og hafi skolfið síðustu daga. „Þetta er ekki góð staða. Við vitum ekki hvenær við komumst heim, hvort við komumst heim.“

„Auðvitað höfum við áhyggjur“

Jón Gunnar Margeirsson, framkvæmdastjóri Jóns & Margeirs, segir að helsta áhyggjuefnið í dag sé heitavatns- og rafmagnslaust í bænum. Að lagnir frostspringi. Því hafi hann lagt inn lykla að húsum í bænum til þess að fá vonandi skýrari mynd af stöðunni. „Auðvitað höfum við áhyggjur,“ segir hann.

Hann segir þó að honum líði ágætlega. Hann hafi ásamt öðrum hjá Jóni og Margeiri unnið að viðgerðum í bænum frá 10. nóvember.

„Við erum búnir að vera hérna upp frá að vinna alla daga og okkur hefur svo sem alveg liðið ágætlega. En auðvitað var þetta hörmulegt slys þarna í síðustu viku, sem við vorum að vinna í kringum. Það braut okkur aðeins en við erum grjótharðir og höldum áfram.

Enginn beygur

Jón Gunnar segir að hann hafi ekki unnið í bænum eftir að gos hófst nema þegar vinnuvélum var bjargað úr hraunjaðrinum. Tekist hafi að bjarga öllum tækjum Jóns og Margeirs og aðstoða aðra verktaka við björgunina.

Hann kveður engan beyg vera í sér og að hann vonist til þess að komast inn í bæinn sem fyrst til þess að halda lagfæringum áfram.

„Hefja þarna lagfæringar á því sem við þurfum að laga og svo taka stöðuna. Við þurfum að laga þetta, koma hita á húsin og koma bæjarfélaginu í gang. Þó að það sé augljóst að það sé ekki að fara í gang á næstunni. Við þurfum allavega að varðveita innviði bæjarins.

Og þú tekur af fullum krafti þátt í því verkefni?

„Engin spurning, alveg grjótharður. Bara áfram á hnefanum.“