Hvíta húsinu ekki til­kynnt um veikindi og að­gerð varnar­mála­ráð­herrans

Frá þessu var greint í gær en málið hefur vakið meiri athygli en ella vegna þess að svo virðist sem hvorki Joe Biden Bandaríkjaforseta né öðrum háttsettum embættismönnum innan stjórnkerfisins hafi verið greint frá veikindum og sjúkrahúsinnlögn Austin fyrr en seint og síðar meir.

Samkvæmt erlendum miðlum var Austin lagður inn vegna þvagfærasýkingarinnar 1. janúar en hvorki Hvíta húsinu, þinginu né aðstoðar varnarmálaráðherranum Kathleen Hicks var greint frá veikindunum fyrr en nokkrum dögum síðar.

Stjórnvöld hafa nú gripið til þess að ráðast í endurskoðun á verkferlum og Hvíta húsið hefur sent frá sér ítrekun til ráðuneyta um að þeim sé skylt að tilkynna forsetaembættinu ef ráðherrar eða aðrir hæstráðendur geta ekki sinn störfum sínum.

Hvíta húsið hefur hins vegar einnig ítrekað að Austin verði áfram varnarmálaráðherra út þetta kjörtímabil Joe Biden. Þá lofaði John Kirby, talsmaður Hvíta hússins í þjóðaröryggismálum, Austin og sagði veikindi og innlögn hans ekki hafa ógnað öryggi landsins.

Greint hefur verið frá því að varnarmálaráðherrann hafi verið svæfður í aðgerðinni í desember en hafi verið með fullri meðvitund frá því hann var lagður inn 1. janúar síðastliðinn. Hann er sagður munu ná fullum bata en læknar hafa varað við því að það muni taka tíma.