Navalní horfinn úr fangelsi

Svo virðist sem Navalní sé horfinn en síðast þegar náðist í hann í fangelsinu var hann veikur.

Talskona Navalnís segir lögmenn hans hafa leitað til tveggja fanganýlenda þar sem Navalní gæti verið en þeim hafi verið sagt að hann sé ekki þar.

„Við vitum ekki enn hvar Alexei er,“ skrifaði Kira Jarmysh á X.

Í frétt rússneska miðilsins Insider segir að Navalní hafi fengið vökva í æð, eftir að hann féll næstum því í yfirlið fyrir tæpri viku síðan. Ekki hefur náðst samband við hann síðan þá.

Hann átti svo að mæta í dómsal gegn fjarfundarbúnað þann 7. desember en mætti ekki. Það sama gerðist í morgun en forsvarsmenn fangelsisins þar sem Navalní afplánaði sögðust eiga í basli með rafmagnsleysi. Seinna sögðu þeir að hann væri ekki þar.

Ítrekað dæmdur eftir eitrun

Navalní er 47 ára gamall en hann var í sumar dæmdur í nítján ára fangelsi fyrir að stofna og fjármagna öfgasamtök. Hann hefur setið í fangelsi frá 2021 þegar hann hlaut tveggja og hálfs árs dóm fyrir að rjúfa skilorð vegna dóms frá 2014, sem Mannréttindadómstóll Evrópu hefur sagt gerræðislegan.

Sjá einnig: Refsing Naval­nís þyngd um ní­tján ár

Ástæða þess að hann braut skilorðið var þó sú að eitrað hafði verið fyrir honum og hann lá við dauðans dyr á sjúkrahúsi í Þýskalandi. Navalní sakar Vladimír Pútin, forseta Rússlands um að bera ábyrgð á eitruninni en notast var við taugaeitrið Novichok, sem einnig var notað til að eitra fyrir fyrrverandi njósnaranum Sergei Skripal og dóttur hans.

Navalní stofnaði á árum áður samtök gegn spillingu í Rússlandi en þau hafa varpað ljósi á spillingu í ríkisstjórn Pútíns. Samtökin voru svo árið 2021 skilgreind sem öfgasamtök var þannig komið í veg fyrir að meðlimir þeirra gætu boðið sig fram til þingkosninga, eins og til stóð. Það leiddi einnig til þess að Navalní var ákærður afturvirkt fyrir að svíkja fé úr fólki sem hafði veitt samtökunum fé. Hann var einnig sakaður um að draga sér fé úr sjóðum samtakanna.

Pútín tilkynnti nýverið að hann ætlaði aftur að gefa kost á sér til embættis forseta, sem þýðir í raun að hann ætli sér að sitja áfram í embætti til ársins 2030 hið minnsta.

Sjá einnig: Pútín hyggst bjóða sig aftur fram

Pútín, sem er orðinn 71 árs, varð fyrst forseti árið 2000. Eftir tvö kjörtímabil sem forseti frá 2000 til 2008 varð Dmitry Medvedev forseti og Pútín forsætisráðherra, þar sem stjórnarskrá Rússlands meinaði forsetum að sitja meira en tvö kjörtímabil samfleytt. Eftir 2012 settist Pútín aftur í embætti forseta og var kjörtímabilið lengt úr fjórum árum í sex og hefur stjórnarskránni verið breytt svo Pútín getur verið forseti til ársins 2036.

Hann yrði þá sá leiðtogi Rússlands sem setið hefur lengst á valdastóli – lengur en Jósef Stalín – síðan valdatíð Péturs mikla lauk árið 1725.

Dulbúinn áróður gegn Pútín

Undanfarna daga hafa sjálfboðaliðar samtaka Navalnís reynt að komast hjá ritskoðun yfirvalda og hvetja fólk til að kjósa Pútín ekki í forsetakosningunum í mars. Það hafa þau gert með því að setja upp skilti, sem látin eru líta út fyrir að vera nýárskveðjur.

Á þeim eru þó faldar upplýsingar í svokölluðum QR kóða sem leiðir til vefsvæðis sem ber titilinn „Rússland án Pútíns“.