Stofn­endur Krónunnar og Bónuss hlut­hafar í nýrri verslun

Gréta María Grétarsdóttir, forstjóri Heimkaupa, segir að nýja lágvöruverslunin ekki vera undir merkjum Heimkaupa og að ekki sé hægt að segja frá því hvar fyrsta verslunin verði opnuð að svo stöddu. Nafn liggur sömuleiðis ekki fyrir.

Hún segir staðsetninguna þó góða og að forsvarsmenn fyrirtækisins séu opnir fyrir fleiri staðsetningum.

Gréta segir forsvarsmenn fyrirtækisins sjá tækifæri á þessum markaði, þar sem ákveðin stöðnun hafi ríkt um nokkuð skeið.

„Það er ekkert að frétta af markaðnum. Þarna eru búnir að vera þrír ráðandi aðilar á matvörumarkaði og allir í ágætis stöðu með góða rekstrarafkomu,“ segir Gréta.

í samtali við Mbl fyrr í dag sagði Gréta að álagning væri há á þessum markaði.

„Við sjáum tækifæri í því að fara þarna inn og hrista upp í markaðnum. Vinna hlutina á annan hátt. Koma með nýja nálgun á markaðinn.“

Jón Ásgeir Jóhannesson er einn af eigendum móðurfélags Heimkaupa og Gréta segir að reynsla hans af rekstri Bónus á sínum tíma muni koma sér frábærlega fyrir nýju verslunina. Þar að auki séu upprunalegir stofnendur Krónunnar einnig meðal eigenda félagsins.

„Þannig að ég er með stofnendur bæði Krónunnar og Bónus í hluthafahópnum mínum,“ segir Gréta. „Þar er gríðarleg reynsla.“