Ramsdale gæti yfirgefið Arsenal

Aaron Ramsdale var óumdeildur fyrsti markvörður Arsenal á síðustu leiktíð þar sem hann hélt fjórtán sinnum hreinu. Arsenal átti gott tímabil, endaði í öðru sæti deildarinnar og tryggði sér sæti í Meistaradeildinni í fyrsta sinn í sex ár.

Ramsdale lék sinn fyrsta landsleik fyrir England fyrr í þessum mánuði en í fyrstu tveimur leikjum Arsenal eftir landsleikjahléið hefur David Raya staðið vaktina á milli stanganna.

Raya kom til Arsenal frá Brentford fyrir tímabilið þar sem hann sló í gegn. Raya er landsliðsmarkvörður Spánverja og var fenginn til að veita Ramsdale meiri samkeppni.

Samkvæmt heimildum Football Insider er Ramsdale ekki tilbúinn að sætta sig við að vera markvörður númer tvö hjá Arsenal. Orðrómar hafa farið af stað um mögulega brottför hans frá félaginu verði hann ekki kominn aftur í byrjunarliðið þegar félagaskiptaglugginn opnar í janúar.

Ramsdale skrifaði undir nýjan langtímasamning við Arsenal í sumar en Mikel Arteta, knattspyrnustjóri liðsins, hefur greint frá því í viðtölum að hann líti eins á markvarðastöðuna og allar aðrar stöður í liðinu. 

Hann sagði í viðtali að það væri ekki margt sem hann sæi eftir á tíma sínum hjá Arsenal, eitt af því væri hins vegar að hafa ekki þorað að skipta markverði útaf í miðjum leik.

„Ég gerði það ekki því ég þorði því ekki. En ég get tekið vængmann af velli og sett miðvörð inn á til að breyta í fimm manna varnarlínu og halda í úrslit. Við gerðum jafntefli í þessum tveimur leikjum sem ég er að tala um og ég var ótrúlega fúll út í sjálfan mig,“ sagði Arteta.