Grimmdar­legar lýsingar á mann­drápinu í Hafnar­firði

Þetta kemur fram í ákæru á hendur ungu mönnunum þremur og ungu konunnar sem þingfest var við Héraðsdóm Reykjaness í dag. Jónas Jóhannsson héraðsdómari hefur ákveðið að þinghald í málinu verði lokað. Í skriflegu svari til fréttastofu vísar hann til ungs aldurs þriggja sakborninga og kröfu foreldra þeirra og verjenda um lokað þinghald.

Þrjú hinna ákærðu eru undir lögaldri en einn eldri, nítján ára. Fréttastofa hefur ekki upplýsingar um afstöðu ákærðu til sakarefnisins við þingfestinguna í dag.

Einkakröfur fyrir hönd móður og dóttur hins látna, pólsks karlmanns á þrítugsaldri, hljóða upp á fimm milljónir króna í hvoru tilfelli fyrir sig.

Lýsingar á því sem á gekk er að finna í ákæru og má lesa hér að neðan. Lesendur eru varaðir við því sem þar kemur fram.

Spörk og stungur

Tveir karlmannanna sem eru ákærðir eru rétt undir lögaldri, sem er átján ár á Íslandi, og einn nítján ára. Þeim er gefið að sök að hafa í sameiningu veist að karlmanninum með ofbeldi og svipt hann lífi á bílastæðinu við Fjarðarkaup í Hafnarfirði að kvöldi fimmtudagsins 20. apríl. Eru þeir sagðir hafa umkringt manninn og sá elsti hafi hrint honum í jörðina.

Í framhaldinu hafi annar hinna yngri sparkað í maga hans þar sem hann lá og sá elsti hótað að stinga hann með hnífi í hálsinn. Hann hafi því næst stappað á manninum og sparkað í höfuð hans.

Þegar pólski maðurinn náði að standa upp hafi þeir þrír aftur veist að honum. Sá elsti fellt hann í jörðina og stungið ítrekað með hníf í búkinn. Sá af þeim yngri sem hafði haft sig meira í frammi hafi sparkað ítrekað í búk hans og sá þriðji reynt að sparka í höfuð hans en spark hans geigaði.

Stunginn ítrekað varnarlaus

Aftur hafi karlmaðurinn náð að standa upp en þá hafi annar þeirra yngri sparkað í maga hans og þeir þrír tekið hann aftur niður í jörðina. Í ákæru segir að þeir hafi allir þrír sparkað ítrekað í höfuð hans og búk. Sá elsti hafi stungið hann ítrekað með hnífi í búkinn þar sem hann lá varnarlaus eftir spörk þeirra.

Karlmaðurinn lést stuttu síðar á vettvangi árásarinnar. Hann hlaut sex stungusár, fjögur í bak, eitt ofarlega í vinstri upphandlegg og eitt fyrir neðan vinstra brjóst sem náði inn í hjarta og skaðaði yfirborðsbláæð og kransæð á aftanverðu hjartanu.

Þá hlaut hann áverka í andliti og á höfði, hnjám og höndum. Á úlpu hans var að finna tíu göt sem báru þess merki að vera eftir stungur með eggvopni.

Myndaði atlöguna og hljóp á brott

Unga konan, sem er rétt undir lögaldri, er ákærð fyrir brot gegn lífi og líkama með því að hafa ekki komið pólska karlmanninum til hjálpar þar sem hann var staddur í lífsháska. Hún hafi ekki beðið ungu mennina um að hætta eða vakið athygli viðbragðsaðila sem óku hjá. Þá hafi hún ekki hringt eftir aðstoð lögreglu heldur staðið hjá og myndað atlöguna. Svo hafi hún hlaupið á brott með þeim uns lögregla hafði uppi á þeim skömmu síðar.

Verjandi hennar sagði í samtali við fréttastofu í apríl að foreldrar hennar hefðu brýnt fyrir henni að taka upp myndbönd ef hún lenti í erfiðum aðstæðum. Hún væri lykilvitni í málinu en ekki sakborningur.

Pólski maðurinn átti móður og barn í heimalandi sínu. Fyrir hönd móðurinnar er gerð einkaréttarkrafa upp á fimm milljónir króna auk vaxta. Einnig að útfararkostnaður upp á tæplega 400 þúsund krónur fáist endurgreiddur. Einnig er gerð einkaréttarkrafa fyrir hönd ólögráða dóttur þeirra upp á fimm milljónir króna.

Jónas Jóhannsson héraðsdómari segir að enn sé beðið ákveðinna gagna í málinu. Þá hafi reynst erfitt að ná öllum verjendum og saksóknara saman fyrr en í haust. Aðalmeðferð sé nú ráðgerð dagana 4. til 6. október.

Fréttin hefur verið uppfærð.