Gat ekki hætt að gráta eftir skilnaðinn

„Ég horfði á sálfræðinginn minn og ég gat bara ekki hætt að gráta,“ útskýrir Clarkson í nýjasta þætti hlaðvarpsins Las Culturitas sem kom út í dag. 

Clarkson segir að þarna hafi hún ekki getað brosað, hún hafi ekki verið ánægð og því þurfti hún á hjálp að halda. Þá segist hún hafa verið á þunglyndislyfjum í tvo mánuði eftir skilnaðinn.

„Þetta var, í fullri hreinskilni, besta ákvörðun allra tíma. Ég hefði ekki komist í gegnum þetta án þeirra.“

Clarkson, sem stýrir spjallþættinum The Kelly Clarkson Show, og Blackstock giftust árið 2013 en sumarið 2020 sótti Clarkson um skilnað við hann. Í skilnaðarpappírunum kom fram að ástæðan væri ágreiningur sem ekki tækist að leysa. 

Þá sótti hún um sameiginlegt forræði en þau eiga saman tvö börn, River Rose sem er níu ára og Remington Alexander, sjö ára.