Verra að missa af HM heldur en að vera dæmdur í átta mánaða bann

Toney var dæmdur í síðasta mánuði eftir að hafa viðurkennt 232 brot á regluverki ensku úrvalsdeildarinnar. Hann var upphaflega ákærður í nóvember á síðasta ári og var því ekki í 26 manna hópnum sem Gareth Southgate tók á HM í Katar. Framherjinn hefur nú í fyrsta skipti tjáð sig opinberlega um bannið.

„Það er gott að finna fyrir stuðning en ég vil ekki að neinn vorkenni mér. Þó ég missi af átta mánuðum af fótbolta þá var mesta refsingin að missa af HM, það dreymir alla um að spila á HM,“ sagði hinn 27 ára gamli Toney.

Hann var upphaflega valinn í landsliðshóp Englands í september á síðasta ári en spilaði ekki og var ekki valinn í hópinn sem fór á HM vegna rannsóknar enska knattspyrnusambandsins.

Toney var greindur með spilafíkn og fékk því styttra bann en ella. Þá má hann byrja að æfa með Brentford í september, fjórum mánuðum áður en banninu lýkur.

„Ég gerði það sem ég gerði, refsingin er refsingin og við höldum áfram. Ég verð bara að einbeita mér að því hvenær ég get hafið æfingar að nýju. Ég vil vera annað dýr þegar ég sný aftur til æfinga. Það verður ógnvekjandi.“

Toney endaði sem þriðji markahæsti leikmaður ensku úrvalsdeildarinnar á nýafstaðinni leiktíð með 20 mörk. Aðeins Erling Braut Håland og Harry Kane skoruðu meira.