Stúlkunni sleppt úr haldi og einn búinn að játa

Öll fjögur ungmennanna sem tengdust málinu voru látin laus úr einangrun í gærkvöldi eftir yfirheyrslu. Hins vegar sætu þau enn gæsluvarðhaldi í tengslum við rannsókn lögreglunnar á höfuðborgarsvæðinu á morði á 27 ára pólskum karlmanni á bílastæði við Fjarðarkaup í Hafnarfirði fimmtudagskvöldið 20. apríl. 

Sautján ára stúlka hefur nú verið látin laus úr haldi en samkvæmt heimildum fréttastofu hefur nítján ára piltur játað sekt sína í glæpnum. Hann játaði fljótlega eftir að hann var handtekinn.

Vilhjálmur H. Vilhjálmsson er verjandi stúlkunnar en hann ræddi við fréttastofu Stöðvar 2 um málið. Þar sagði hann að stúlkan væri vitni í málinu en ekki sakborningur og hefði því ekki átt að sæta gæsluvarðhald. Upptökur hafi sýnt að hún átti ekki aðild að morðinu og var það kjarninn í rökstuðningi Landsréttar sem felldi úrskurð Héraðsdóms úr gildi um sexleytið. 

Hér fyrir neðan má sjá viðtalið við Vilhjálm en það hefst á fjórðu mínútu myndbandsins. Þar á undan er viðtal við Gerard Pokruszynski, sendiherra Póllands á Íslandi.

Vitni en ekki sakborningur

Í viðtali við fréttastofu sagði Vilhjálmur lögregluna hafa verið með „sönnunargögn frá umbjóðanda mínum, myndband af atburðarásinni, sem beinlínis sannaði það að hún var vitni í málinu en ekki sakborningur.“ 

„Og vitni eiga ekki að sæta gæsluvarðhaldi.“

Aðspurður út í hlut stelpunnar í málinu sagði Vilhjálmur: „Hún var rangt barn á röngum stað á röngum tíma. Hún var þarna á staðnum. Og foreldrar hennar höfðu uppálagt henni það að ef hún lenti í ótryggum aðstæðum að taka það upp á símann sinn, sem hún gerði. Síðan þegar hún var handtekin og tekin af henni skýrsla framvísað hún þessum upptökum og leyfði lögreglu að skoða símann sinn.“

„Þessar upptökur sýna það svart á hvítu að hún átti enga aðild að þessu, var alltaf í fimm til átta metra fjarlægð frá atburðarásinni og veitti hvorki liðsinni að árásinni í orði eða verki.“

„Þetta er kjarninn í rökstuðningi Landsréttar sem felldi úrskurð Héraðsdóms úr gildi bara rétt í þessu. Að myndbandið styddi framburð stúlkunnar og af myndbandinu væri ljóst að hún ætti enga aðild að málinu og þess vegna væru ekki skilyrði til þess að halda henni í gæsluvarðhaldi,“ sagði Vilhjálmur.

Komin heim til foreldra sinna

Vilhjálmur sagði að það hefði verið búið að benda lögreglunni á þetta og að það væri „í raun óskiljanlegt að lögreglan hafi ekki sleppt henni í gær eftir síðari skýrslutökuna heldur látið úrskurða sig til þess.“

„Hún er laus, komin heim til foreldra sinna. Sem betur fer. Auðvitað getur hver maður sett sig í þau spor að þurfa að upplifa slíkt sem barn og það mun örugglega taka hana einhvern tíma að vinna úr því,“ sagði Vilhjálmur um stöðu stúlkunnar núna.

„Hún var allan tímann lykilvitni í þessu máli sem lagði sig alla fram við að upplýsa málið, afhenti lögreglunni mikilvæg sönnunargögn og í raun og veru upplýsti málið fyrir lögreglu. Þess vegna átti hún aldrei að sæta gæsluvarðhaldi og ef hún átti að sæta gæsluvarðhaldi þá átti að láta hana lausa miklu fyrr,“ sagði hann jafnframt.