Varað við úti­vist og á­reynslu við miklar um­ferðar­götur

Hækkaður styrkur svifryks hefur mælst víðsvegar á höfuðborgarsvæðinu í dag. Hækkaður styrkur orsakast af því að í dag er hægur vindur í borginni og kalt, götur þurrar og engin úrkoma. Því nær umferðin að þyrla upp ryki sem hangir svo í loftinu þar sem vindhraðinn er of lítill til að færa það á brott. Búist er við að svifryk verði áfram hátt í tengslum við eftirmiðdagsumferðina.

Þetta kemur fram í tilkynningu frá Heilbrigðiseftirliti Reykjavíkur.

Því er mælst til þess að þeir sem eru viðkvæmir fyrir í öndunarfærum og börn ættu að forðast útivist og áreynslu, svo sem íþróttaiðkun, í nágrenni stórra umferðagatna. 

„Almenningur er hvattur til að draga úr notkun einkabílsins ef unnt er, til dæmis geyma ferðir sem ekki eru aðkallandi, nýta sér frekar almenningssamgöngur, sameinast í bíla eða nota aðra vistvæna samgöngumáta,“ segir í tilkynningunni.

Gert er ráð fyrir meiri vindi á morgun og því minni líkur á að þetta verði viðvarandi ástand.