Samgöngusáttmáli í fullu gildi og stór­fram­kvæmdir í undir­búningi

Stjórnarflokkarnir endurnýjuðu umboð sitt til áframhaldandi samstarfs í alþingiskosningunum í september 2021 þegar þeir fengu samanlagt 54 prósenta fylgi, aðallega vegna mikillar fylgisaukningar Framsóknarflokksins. Samkvæmt könnunum Maskínu og Galllups er samanlagt fylgi flokkanna hins vegar komið í um 40 prósent.

Samkvæmt febrúarkönnunum fyrirtækjanna nýtur Samfylkingin annan mánuðinn röð mest fylgis flokka með 23,3 prósent hjá Maskínu og 24 prósent hjá Gallup í febrúar. Á sama tíma og fylgi flokksins rúmlega tvöfaldast frá kosningum minnkar fylgi Framsóknarflokksins hins vegar um 5-7 prósentustig, Vinstri grænna um fimmog Sjálfstæðisflokksins um tvö til fjögur prósentustig. Ráðherrar stjórnarflokkanna sátu sinn hundraðasta ríkisstjórnarfund í morgun.

„Ég kippi mér nú ekki mikið upp við skoðanakannanir. Veit að þær eru sí breytilegar og sí kvikar. Ég held að þessi ríkisstjórn hafi bæði átt tiltölulega góðu fylgi að fagna, bæði á síðasta kjörtímabili og þessu. Hefur að mestu leyti bara farnast ágætlega í sínum störfum,“ sagði Katrín að loknum ríkisstjórnarfundi í dag.

Sjálfstæðismenn og fleiri í minnihluta borgarstjórnar og nokkrir þingmenn Sjálfstæðisflokksins hafa gagnrýnt samgöngusáttmála ríkisstjórnar og sveitarfélaga á höfuðborgarsvæðinu. Bæði fyrir seinagang sumra verkefna og mikinn kostnaðarauka við einstök verkefni.

Sigurður Ingi Jóhannsson innviðaráðherra segir sáttmálann enn í fullu gildi og kostnaðinn ekki farinn úr böndunum. Kostnaður hafi hins vegar aukist með vísitöluhækkunum meðal annars vegna stríðsins í Evrópu.

„Síðan hafa einhver verkefni þroskast og stækkað. Væntingar til þess að sáttmálinn væri stærra tæki til enn frekari framkvæmda hafa vaxið mjög mikið,“ segir innviðaráðherra.

Það væri því eðlilegt að staldra við og upplýsa stýrihópa og stjórnir og taka þær ákvarðanir sem þyrfti að taka. Skoða hvort þörf væri á að uppfæra sáttmálann vegna ákveðinna aðstæðna.

„Í mínum augum er hann nú þegar búinn að skila fullt af jákvæðum verkefnum í höfn og önnur á leiðinni,“ segir Sigurður Ingi.

Margir segja hins vegar að lítið sé að gerast varðandi stór verkefni eins og Arnarnesveg, Sundabraut og stokk á Sæbraut. Innviðaráðherra segir öll þessi verkefni í góðum farvegi. Eftir því sem verkefni væru betur undirbúin þeim mun styttri og öruggari yrðu þau í framkvæmd og fjármögnun.

„Sundabrautarverkefnið er risastórt. Það hefur aldrei verið áætlað að það byrji fyrr en 2026 og ljúki þrjátíu og eitt. Það er samt búið að vinna í því í mörg ár til þess að það náist. Arnarnesvegurinn er hins vegar að fara í útboð, svo dæmi sé tekið. Hann er bara af allt annarri stærðargráðu. Sæbrautar stokkurinn er ekki bara orðinn forsenda fyrir Sundabraut. Hann er líka forsenda þess að við ætlum að byggja þessa björgunarmiðstöð og koma öllum hlutum til og frá. Þannig að hann hefur verið að stækka í væntingum og kröfum til hans,“ segir Sigurður Ingi Jóhannsson.