Hafa sam­þykkt verk­falls­boðun

Uppfært kl. 22.16

Í fréttatilkynningu sem Samninganefnd Eflingar sendi frá sér rétt í þessu kemur fram að nefndin fagni hugrekki verkafólks á Íslandshótelum og samþykki næstu lotu verkfallsboðana:

Eflingarfélagar hjá Íslandshótelum hafa með afgerandi meirihluta samþykkt ótímabundna vinnustöðvun á öllum hótelum keðjunnar í Reykjavík. Var boðunin samþykkt með 124 atkvæðum gegn 58 mótatkvæðum og 7 sem óskuðu að taka ekki afstöðu. Af þeim sem greiddu atkvæði voru því 65 prósent sem samþykktu boðunina. Samtals kusu 189 af þeim 287 sem voru á kjörskrá og var kjörsókn því 66 prósent prósent sem er mun meira en sést hefur í verkfallskosningum félagsins á síðustu árum. Hefst vinnustöðvun að óbreyttu þriðjudaginn 7. febrúar.

Stjórnendur Íslandshótela beittu starfsfólk miklum þrýstingi og ólögmætum hótunum um tekjumissi tækju þau afstöðu með verkfalli. Er það skýrt brot á ákvæðum laga um stéttarfélög og vinnudeilur. Var allt starfsfólk skikkað á sérstaka fundi þar sem stjórnendur ræddu um kjaradeilu Eflingar við SA á villandi og einhliða hátt, og komu hótunum sínum í þá veru óspart á framfæri. Bárust félaginu margar kvartanir frá félagsfólki vegna þessa.

Ríkissáttasemjari samþykkti sérstaka miðlunartillögu sem tímasett var til að koma í veg fyrir að félagsfólk Eflingar hjá Íslandshótelum fengi að nýta sér rétt sinn til verkfalls. Hann endurtók jafnframt hótanir atvinnurekenda um tekjumissi. Tveir ráðherrar Vinstri grænna í ríkisstjórn, Guðmundur Ingi Guðbrandsson félags- og vinnumarkaðsráðherra og Katrín Jakobsdóttir forsætisráðherra, vissu af miðlunartillögu ríkissáttasemjara áður en hún var kynnt samninganefnd Eflingar. Ráðherrarnir stigu fram opinberlega til stuðnings við miðlunartillöguna þrátt fyrir háværa gagnrýni allra heildarsamtaka launafólks á hana.

Verkfallsboðunin tekur til starfsstöðva Íslandshótela á félagssvæði Eflingar. Er þar um að ræða félagsfólk sem sinnir þrifum á herbergjum og í sameiginlegum rýmum, störfum í eldhúsi, við framreiðslu veitinga, þvott og fleira. 

SA áréttir fullan stuðning við Íslandshótel

Hótel Íslandshótela á höfuðborgarsvæðinu eru Hótel Saga nýtt hótel í Lækjargötu, Grand Hótel við Kringlumýrarbraut, Hótel Centrum á horni Túngötu og Aðalstrætis, Fosshótel við Þórunnartún, Fosshótel við Barónsstíg, Fosshótel Lind við Rauðarárstíg og hótel Rauðará við sömu götu.

Í síðasta tilboði til SA krafðist samninganefnd Eflingar þess að hótelstörf yrðu hækkuð um launaflokk. Töfluhækkun tilboðs Eflingar myndi skila almennum hótelstarfsmanni með eins árs starfsaldur rúmlega 55 þúsund króna hækkun grunnlauna, til viðbótar við framfærsluuppbót að upphæð 15 þúsund á mánuði vegna hás framfærslukostnaðar á höfuðborgarsvæðinu.

Samninganefnd Eflingar samþykkti verkfallsboðunina þann 21.janúar síðastliðinn eftir árangurlausar samningaviðræður við Samtök atvinnulífsins. 

Þrátt fyrir miðlunartillögu í deilu félagsins við Samtök atvinnulífsins sem ríkissáttasemjari lagði fram ákvað Efling ætlar að halda atkvæðagreiðslunni til streitu gg krefjast þess að miðlunartillagan yrði felld úr gildi. Efling lagði fram stjórnsýslukæru vegna tillögunnar til félags- og vinnumarkaðsráðuneytisins.

Líkt og Vísir hefur greint frá hefur SA áréttað fullan stuðning samtakanna við Íslandshótel en sá stuðningur felur meðal annars í sér heimild til að bæta Íslandshótelum allt tjón sem af vinnustöðvun hlýst, verði af verkfalli, úr svokölluðum vinnudeilusjóði samtakanna.