Skýrsla Stefáns: Komið bara með þessa helví*** Svía!

Óðinn Þór Ríkharðsson byrjaði annan leikinn í röð og spurning hvort hann sé búinn að taka byrjunarliðssætið í liðinu af Sigvalda Guðjónssyni. Óðinn var góður í fyrri hálfleiknum skoraði fimm mörk úr sex skotum. Þegar tæplega tíu mínútur voru liðnar af hálfleiknum fóru andstæðingar Íslands í 7 á 6. Spiluðu með sjö menn í sókn og tvo inni á línunni. 

Það verður að segjast að íslenska vörnin réði illa við það og ýmist voru línumennirnir opnir og fiskuðu víti eða skoruðu, eða skytturnar fengu pláss og nýttu sér það vel. Um miðjan hálfleikinn munaði tveimur mörkum á liðunum, 9-7.

Aron Pálmarsson fyrirliði byrjaði leikinn og spilaði fyrstu þrettán mínútur leiksins og það nokkuð vel. Inn á fyrir hann kom Janus Daði Smárason og hann nýtti sitt tækifæri mjög vel og fór strax að láta til sín taka. Hann skoraði þrjú svipuð mörk í hálfleiknum og dreifði boltanum vel.

Ómari Ingi Magnússon spilaði fyrstu 23 mínútur fyrri hálfleiksins og var síðan tekin af velli, en þá var hann kominn með 5 stoðsendingar og þrjú mörk. Landsliðsþjálfarinn Guðmundur Guðmundsson dreifði álaginu vel í fyrri hálfleik og íslenska liðið alltaf tveimur skrefum á undan Grænhöfðaeyjum en hálfleikstölur voru 18-13 og Ísland með fín tök á leiknum. Það mátti samt ekkert slaka á, munum eftir leiknum gegn Ungverjum.

Sigvaldi byrjaði síðari hálfleikinn í hægra horninu og það var alveg ljóst frá upphafsmínútu leiksins að það átti að dreifa álaginu eins mikið og hægt var. Hægt og rólega drap íslenska landsliðið þennan leik, og það má segja að mark 29 hafi verið skreytingin ofan á kökuna þegar Gísli Þorgeir Kristjánsson skoraði geggjað sirkúsmark eftir sendingu frá Sigvalda í hægra horninu. Þetta gaf andstæðingunum ákveðin tón, að við værum að fara loka þessum leik.

Grænhöfðaeyjar héldu áfram í 7 á 6 og það gekk stundum en kom of oft í bakið á þeim með þessum yndislegu skotum Elliða Snæs frá miðju. Skot sem hann ætti að sækja um einkaleyfi fyrir og hann einhvern veginn nær boltanum alltaf í markið. Björgvin Páll skoraði sjálfur tvö mörk yfir allan völlinn. Alls skoraði liðið ellefu mörk í tómt mark Grænhöfðeyinga, sem er í raun lygilegt.

Að lokum ofboðslega þægilegur tíu marka sigur Íslands sem fer með kassann úti í leikinn við Svía. Lykilleikmenn fengu að hvíla og sumir fengu tækifæri og stimpluðu sig inn í mótið.

Næst, Svíþjóð, föstudagskvöld, full höll, allir mættir og alvöru stuð. Fulla ferð, áfram gakk og vinnum þessa Svía. Grýlan er látin. Komið bara með þessa helví*** Svía. Við neglum þá.