Segir að De Bru­yne spili betur þegar reiður sé

De Bruyne og liðsfélagar hans hjá Belgíu áttu ekki sjö dagana sæla í Katar. De Bruyne lét ummæli falla í aðdraganda mótsins um aldurssamsetningu hópsins og segja má að þau hafi ekki fallið vel í kramið hjá samherjum hans.

Belgía átti svo vægast sagt erfitt uppdráttar á HM og féll snemma úr leik. De Bruyne hafði því nægan tíma til að leyfa fýlunni að byggjast upp fyrir leik Manchester City og Liverpool í enska deildarbikarnum. Miðjumaðurinn lagði upp tvö mörk í 3-2 sigri og hrósaði Guardiola honum eftir leikslok.

„Kevin, þegar hann spilar með þennan eldmóð innra með sér – hann þarf að finna eldmóðinn – þvílíkur leikmaður. Hann hefur verið hér í 7-8 ár og áorkað svo miklu, hann er goðsögn og einn besti leikmaður í sögu félagsins.“

„Ég þarf alltaf að ýta aðeins við honum, svo hann finni þennan eldmóð. Ég veit þetta eru margir leikir sem við spilum en þegar hann spilar svona í mikilvægum leikjum er hann óstöðvandi.“

Lærisveinar Guardiola heimsækja Leeds United þann 28. desember. Liðið þarf nauðsynlega á sigri að halda til að setja pressu á topplið Arsenal.