Martínez sagði Ten Hag að kaupa sig til að losna við Arsenal

Martínez var varnarmaður Ajax í Hollandi frá 2019 þar til í sumar og lék þar undir stjórn Erik ten Hag, sem tók við Manchester United í sumar.

Ten Hag greinir frá því í viðtali við hollenska fjölmiðla að Martínez hafi verið ákveðinn í að yfirgefa Ajax en Arsenal, topplið ensku úrvalsdeildarinnar, lagði mikla áherslu á að semja við kappann. Hann vildi frekar leika fyrir ten Hag í Manchester.

„Ef við hefðum ekki tekið hann hefði hann farið til Arsenal. Hann var í forgangi þar. Licha (Lisandro Martínez) hringdi í mig á einum tímapunkti: „Þjálfari, ég er að fara frá Ajax hvort sem er, en ef þú vilt mig fer ég til Manchester United“,“ segir ten Hag.

„Þá hugsaði ég að ég gæti ekki skotið mig í fótinn. Hann hefði aldrei verið áfram í Amsterdam, það var ljóst. Við slógum til og gengum frá samningum,“ segir hann enn fremur.

Manchester United snýr aftur úr HM-pásu í kvöld þegar liðið mætir Jóhanni Berg Guðmundssyni og félögum í Burnley í enska deildabikarnum.

Liðið situr í fimmta sæti ensku úrvalsdeildarinnar með 26 stig, þremur frá Meistaradeildarsæti. Nottingham Forest er næsti andstæðingur liðsins í deildinni, þann 27. desember.