Því flest þekkjum við það að við gleymum því sjaldnast að hlaða símann okkar. En erum á sama tíma gjörn á að gleyma að hlaða okkar eigin batterí.
Fyrir árið 2023 er því um að gera að setja sér markmið um að ná meiri hvíld eða meiri gleði út úr fríum þótt þau séu ekki löng. Því það að geta kúplað sig frá vinnu, áreiti eða álagi gerir okkur alltaf svo gott.
Tvær tegundir af fríum eru að njóta vaxandi vinsælda.
Annars vegar er það frí sem kallast Heimafrí, á ensku Staycation.
Hins vegar frí sem kallast Leikjafrí, eða á ensku Playcation.
Báðar tegundir ganga út á að endurhlaða batteríin okkar, sem um leið spornar gegn líkum á kulnun, kvíða eða annarri vanlíðan.
Heimafrí hljóma sem mjög einföld frí. En til þess að þau takist, þarf maður samt að vera mjög meðvitaður um að njóta þess til hins ýtrasta. Þess vegna er mælt með því að í heimafríum sé síminn settur á Silent.
Heimafrí gengur nefnilega út á algjöra hvíld og afslöppun. Við meðvitað tökum ákvörðun um að vera ekki að þrífa, þvo þvott, stússast, taka til í bílskúrnum eða kíkja í tölvupóstinn.
Heimafrí er sambærileg hvíld og við upplifum til dæmis þegar við förum í sumarbústað. Þar sem við náum að kúpla okkur frá vinnu, borðum góðan mat, lesum góða bók, kveikjum á kertum og höfum það kósí. Allt amstur hverfur úr huga okkar og við mætum endurnærð til vinnu aftur á mánudeginum. Þegar við tökum heimafrí er markmiðið að ná þessu sama andrúmslofti. Nema heima fyrir.
Leikjafrí eru aðeins öðruvísi. Því í stað þess að fókusera á hvíld og afslöppun tökum við meðvitaða ákvörðun um að hlaða batteríin okkar með gleði og gaman. Að taka langan laugardag í einhverri óvissuferð eða með því að gera eitthvað mjög skemmtilegt er tilvalið sem Leikjafrí.
Alveg eins og gildir með heimafríin takast þessi frí þó best ef við erum svolítið meðvituð um að við séum að taka frá tíma fyrir þau með það að markmiði að njóta þeirra til fulls. Barnafjölskyldur geta búið til dagskrá með krökkunum þar sem eitthvað óvenjulegt og öðruvísi er gert frá morgni til kvölds. Hlátur og gaman er hér útgangspunkturinn og það þarf ekkert endilega að búa til leikjafrí sem eru dýr. Tilvalið í Leikjafríum er til dæmis að spila eða að fjölskyldumeðlimir sjái fyrir einhverri sýningu eða skemmtun sem búið er að æfa og undirbúa.
Það sem sumarfrí, heimafrí og leikjafrí eiga hins vegar sameiginlegt er að þetta eru frí til að skipuleggja í samvinnu við maka og fjölskyldu. Hvort heldur sem er frí í einn góðan dag, eitt kvöld eða helgi.
Hverjir þurfa á þessu að halda?
Við þurfum öll að vera meðvituð um að hlaða batteríin okkar jafn reglulega og markvisst og símann okkar. En fyrir þann hóp af fólki sem telur sumarfríið sitt vera nægilegt frí eða kvöld og helgar, er ágætt að benda á nokkrar vísbendingar um að mögulega þurfum við að þjálfa okkur í að hlaða batteríin okkar oftar og reglulega.
Gott er að horfa á eftirfarandi atriði:
- Hvort matarvenjur eigi það til að vera óreglulegar eða óhollar
- Hvort við erum oft að hugsa um vinnuna
- Hvort okkur finnist stundum erfitt að einbeita okkur
- Hvort okkur finnist við stundum vera með of marga bolta á lofti
- Hvort við séum oftar veik eða slöpp miðað við það sem við erum vön
- Hvort svefnmynstrið okkar sé að breytast
- Hvort við finnum oftar fyrir orkuleysi eða þreytu
- Pirringur eða stuttur þráður
- Hvort okkur finnist okkur vanta hvatningu eða drifkraft
- Hvort við séum of sjaldan að gefa okkur tíma til að vera með fjölskyldu eða vinum
- Hvort við séum farin að drekka áfengi of oft eða of mikið
