Í fréttatilkynningu Samkeppniseftirlitsins um ákvörðun þess um að íhlutast ekki í málinu segir að í fyrri ákvörðunum Samkeppniseftirlitsins sem varða Síldarvinnsluna hafi eftirlitið aflað upplýsinga og sjónarmiða um tengsl Síldarvinnslunnar við Samherja hf. og Gjögur hf./Kjálkanes ehf., en slíkt hafi þýðingu fyrir úrlausn samrunamála.
Þegar tilkynnt var um kaup Síldarvinnslunnar á Vísi greindi fréttastofa frá því að Samherji myndi eiga, beint og óbeint, fimmtung af heildaveiðiheimilda í landinu. Það er verulega yfir lögbundnum viðmiðum.
Samherji á 32,64 prósent hlut í Síldarvinnslunni en telst ekki tengdur aðili samkvæmt lögum um stjórn fiskveiða.
Talsverð tengsl milli útgerðanna
Rannsóknir Samkeppniseftirlitsins hafa leitt í ljós talsverð stjórnunar-, eigna- og viðskiptatengsl milli framangreindra útgerða, sem fela í sér vísbendingar um að stofnast hafi til yfirráða í Síldarvinnslunni umfram það sem áður hefur verið greint frá í tilkynningum um samruna.
Í tilkynningunni segir að samkeppnisleg áhrif samrunans hafi verið tekin til athugunar út frá tveimur sjónarhornum, það er annars vegar miðað við samrunann eins og hann var tilkynntur eftirlitinu og hins vegar miðað við möguleg sameiginleg yfirráð Samherja og tengdra félaga yfir Síldarvinnslunni.
Niðurstaðan var að ekki væru forsendur til íhlutunar, hvort sem litið væri til hinna þrengri eða víðtækari yfirráða. Þannig séu ekki forsendur til þess að ætla að markaðsráðandi staða sé að myndast eða styrkjast, auk þess sem breyting á samþjöppun vegna kaupa á Vísi sé undir þeim viðmiðum sem stuðst er við í evrópskum samkeppnisrétti. Þá gefi fyrirliggjandi gögn ekki til kynna að samkeppni raskist að öðru leyti.
Reglur um aflahlutdeild ekki á borði Samkeppniseftirlitsins
Í tilkynningunni segir að ákvörðun eftirlitsins sé vakin athygli á því að yfirráð yfir útgerðum séu ekki skilgreind með sama hætti í samkeppnislögum og lögum fiskveiðistjórnun.
Það sé verkefni Fiskistofu að fylgja eftir að farið sé að ákvæðum fiskveiðistjórnunarlaga um hámarks aflahlutdeild.
Fyrir liggi í málinu að aflahlutdeild samrunaaðila kunni að fara yfir hámarkshlutdeild samkvæmt lögum um stjórn fiskveiða, hvort sem miðað sé við þau yfirráð sem samrunaaðilar byggja á í samrunaskrá eða möguleg víðtækari yfirráð. Við mat og mögulega úrlausn á þessu komi til kasta Fiskistofu.
Samkeppniseftirlitið verður Fiskistofu innan handar
Í tilkynningunni segir að í tilefni af málinu hafi Samkeppniseftirlitið átt fund með Fiskistofu og gert henni grein fyrir vísbendingum um víðtækari yfirráð. Samkeppniseftirlitið muni veita Fiskistofu frekari upplýsingar, ef nauðsynlegt þykir.
Þá er tekið fram að með ákvöðrun um að heimila samruna Síldarvinnslunnar og Vísis sé ekki tekin endanleg ákvörðun um yfirráð yfir Síldarvinnslunni í skilningi samkeppnislaga. Málefni þessi kunni því að koma til frekari rannsóknar á síðari stigum.
Áður en rannsókn á samrunanum hófst kynnti Samkeppniseftirlitið jafnframt ákvörðun um að hefja heildstæða athugun á stjórnunar- og eignatengslum sjávarútvegsfyrirtækja.
