Segir verknað Claudiu ekki hafa leitt til morðsins í Rauða­gerði

Claudia er ein þriggja sem eru ákærð fyrir að hafa gerst sek um samverknað í morðinu. Ákæruvaldið fer fram á að þau verði sakfelld fyrir samverknað en hlutdeild til vara. Fangelsisdómur fyrir samverknað er minnst fimm ár. 

Síðasti dagur aðalmeðferðar fer fram fyrir Landsrétti í dag og hafa saksóknar og verjandi Angjelins Sterkaj, sem hefur játað morðið, flutt mál sitt. Angjelin gekkst við morðinu við rannsókn málsins en segist hafa verið einn að verki. Þá hefur hann haldið því fram að hann hafi skotið Armando í sjálfsvörn. 

Claudia er sökuð um að hafa tekið þátt í skipulagningu morðsins og að hafa fylgst með tveimur bílum, sem Armando hafði til umráða, og látið Angjelin vita þegar bílarnir voru færðir kvöldið sem Armando var  myrtur. Claudia hefur gengist við þeirri verknaðarlýsingu sem lýst er í ákærunni, sem sagt að hún hafi fylgst með bíl Armandos og sent Shpetim Qerimi, sem er einnig ákærður í málinu og var með Angjelin í Rauðagerði, sms sem í stóð „hi sexy.“

Claudia hafi ekki tekið þátt í meintum skipulagsfundi í Borgarnesi

Fram kom fyrir héraðsdómi að þau hafi verið búin að ákveða fyrirfram að Claudia sendi þau skilaboð til Angjelin þegar Armando færi frá vini sínum, sem bjó í Reykjavík Downtown Appartments á Rauðarárstíg, laugardagskvöldið 13. febrúar. 

Seinbergur Finnbogason, verjandi Claudiu, sagði í málflutningi sínum fyrir Landsrétti að Claudia hafi ekkert vitað af því fyrir fram að Angjelin hyggðist svipta Armando lífi. Benti hann til dæmis á að gögn í málinu sýni að Claudia hafi ekki verið með á fundi Angjelins og Shpetims í Borgarnesi föstudagskvöldið 12. febrúar. 

Hafi þeir rætt fyrirhugað morð á þeim fundi, eins og ákæruvaldið vill meina, hafi Claudia ekki tekið þátt í því samtali. Þá hafi komið fram við skýrslutökur að Claudia hafi talið Angjelin ætla að vera á norðurlandi, þar sem hann var í fríi með vinum, til mánudags eða þriðjudags. 

Steinbergur tók við vörninni úr hérð

Auk þess hafi hennar verk þetta laugardagskvöld, að fylgjast með bíl Armandos og senda skilaboðin „hi sexy“, ekki haft nein áhrif að hans mati á það sem á eftir kom þar sem Angjelin og Shpetim hafi þegar verið komnir í Rauðagerði þegar skilaboðin voru send.

Þá hafi Claudia verið mjög hissa þegar hún sá fréttir af morðinu á sunnudagsmorgninum og verið mjög hrædd dagana á eftir. Samfélagið hafi verið á hliðinni vegna þessa óupplýsa morðs og það sé, að mati Steinbergs, ekki réttlátt af ákæruvaldinu að ætla sekt Claudiu á því að hún hafi ekki tilkynnt lögreglu grunsemdir sínar strax dagana á eftir. 

Steinbergur tók við sem verjandi Claudiu af Sverri Halldórssyni sem flutti málið í héraðsdómi. Steinbergur var lögmaður Antons Kristins Þórarinsson sem var um tíma í gæsluvarðhaldi vegna rannsóknar málsins. Anton var síðar úrskurðaður í farbann vegna málsins en var ekki ákærður. Steinbergur var settur af sem verjandi Antons og fékk stöðu vitnis fyrir að hafa verið í samskiptum við aðra sakborninga. Steinbergur hefur til undirbúnings skaðabótamál fyrir hönd Antons Kristins.