For­stöðu­konan stefnir Dyngjunni vegna van­goldinna launa og á­virðinga um mis­ferli í starfi

Eins og Vísir greindi frá í morgun telur stjórn heimilisins fyrirliggjandi að forstöðukonan hafi misnotað úttektarheimildir við innkaup fyrir Dyngjuna og fjármagnað þannig einkaneyslu sína.

Steinbergur Finnbogason lögmaður forstöðukonunnar segir að hann hafi í morgun, fyrir hönd hennar, lagt fram stefnu á hendur heimilinu og stjórnarformanni þess Önnu Margréti Kornelíusardóttur, þar sem krafist er „vangoldinna launa og áunnins orlofs auk einnar og hálfrar milljónar króna miskabóta fyrir tilhæfulausar ávirðingar um misferli í starfi.“

Segir heimilið skulda forstöðukonunni rúmlega sjö milljónir króna

Þetta er meðal þess sem fram kemur í harðorðri yfirlýsingu sem Steinbergur sendi til fjölmiðla nú í hádeginu. Hann vill meina að frétt Vísis í morgun hafi verið einhliða og dramatísk, en Steinbergur tekur fram að hann vilji með yfirlýsingu sinni leggja lóð sínar á þær vogaskálar að fréttin verði ekki endurflutt á öðrum miðlum.

Í yfirlýsingunni segir að eftir „tæplega tíu ára farsælt starf fyrir Dyngjuna var komið að aldurstengdum starfslokum skjólstæðings míns sem forstöðukonu. Hún hafði í gegnum árin oftsinnis frestað því að taka út laun sín að fullu eða að nýta orlofsréttindi sín til þess að koma til móts við hinn viðvarandi lausafjárvanda heimilisins. Við hin fyrirhuguðu starfslok blasti sú staða við að heimilið skuldaði skjólstæðingi mínum ríflega sjö milljónir króna.“

Telur ásakanirnar fram settar til að komast hjá launagreiðslum

Steinbergur telur að stjórn heimilisins hafa staðið frammi fyrir þeim vanda að gjaldhæfi þess leyfði ekki slíkt uppgjör.

„Samkomulag yrði að nást um mun lægri uppgjörsupphæð ef takast ætti að forða heimilinu frá gjaldþroti. Liður í að skapa stjórninni samningsstöðu hafi verið að sá frækornum efasemda um heiðarleika forstöðukonunnar,“ segir lögmaðurinn og að telur ásakanirnar á hendur skjólstæðings hans megi rekja til þessa.

„Öllum ávirðingum um misnotkun á aðstöðu eða notkun debetkorts heimilisins hefur verið svarað af mikilli nákvæmni. Hvert einasta atriði ásakana eða efasemda hefur verið rakið og hrakið fyrir tilstilli afar nákvæms bókhalds, í raun fyrirmyndar heimilisbókhalds, þar sem meira að segja kassakvittunum úr matvöruverslunum og bakaríium hefur verið haldið til haga alla tíð.“