Aubameyang genginn í raðir Chelsea

Chelsea greiðir um 10,3 milljónir punda fyrir leikmanninn sem samsvarar um 1,7 milljarði króna. Hann skrifar undir tveggja ára samning við þá bláklæddu.

Með kaupunum á Aubameyang hefur Chelsea nú eytt 278,4 milljónum punda í sumarglugganum, en aldrei hefur eitt félag eytt jafn miklum peningi í einum og sama glugganum frá upphafi.

Eins og aðdáendur ensku úrvalsdeildarinnar vita þekkir þessi 33 ára framherji deildina vel. Hann gekk í raðir Arsenal í lok janúargluggans árið 2018 og lék með liðinu þangað til í febrúar á þessu ári þegar hann færði sig yfir til Barcelona.

Með Arsenal lék Aubameyang 128 leiki í ensku úrvalsdeildinni og skoraði í þeim 68 mörk. Þá er framherjinn markahæsti landsliðsmaður Gabon frá upphafi með 30 mörk í 72 leikjum.