Kvöld sem gæti gal­opnað topp­bar­áttuna og gjör­breytt stöðu mála á botni deildarinnar

Mánudagskvöldið 22. ágúst gæti haft gríðarleg áhrif á lokastöðuna í Bestu deildinni. Vissulega eru nokkrar umferðir eftir af hefðbundinni deildarkeppni og svo úrslitakeppni í kjölfarið en það er ljóst að pendúllinn getur sveiflast allverulega í kvöld.

Úlfarsárdalur

Klukkan 19.15 í Grafarholti tekur Fram á móti toppliði Breiðabliks. Heimamenn hafa verið illviðráðanlegir síðan þeir færðu sig úr Safamýri. Bæði innan vallar sem utan en segja má að mikil stemning einkenni leik liðsins þessa dagana.

Fram hefur ekki enn tapað á nýjum heimavelli sínum. Ásamt því að vinna FH og Leikni Reykjavík þá hefur Fram gert jafntefli við ÍBV, Stjörnuna og Víking í þeim sex leikjum sem liðið hefur leikið þar til þessa.

Topplið Breiðabliks þarf í raun að vera fyrsta liðið til að sigra heimamenn í Úlfarsárdal þar sem forysta liðsins á toppi deildarinnar hefur minnkað hægt og rólega undanfarnar vikur.

Blikar tryggðu sér sæti í undanúrslitum Mjólkurbikarsins á föstudaginn var og hefur því ekki haft mikinn tíma til að jafna sig milli leikja. Það hefur verið staðan undanfarnar vikur þar sem liðið tók þátt í undankeppni Sambandsdeildar Evrópu.

Það hafði áhrif á gengi liðsins í Bestu deildinni en Breiðablik hefur aðeins unnið tvo af síðustu sex leikjum sínum þar og forystan á toppi deildarinnar komin niður í aðeins þrjú stig.

Heimavöllur hamingjunnar

Íslands- og bikarmeistarar Víkings taka á móti sjóðandi heitum Valsmönnum í Víkinni í kvöld. Það virðist sem Ólafur Jóhannesson hafi náð að kveikja neista á Hlíðarenda sem var sárlega vantað. Allt í einu eru Valsarar farnir að gæla við að blanda sér af alvöru í toppbaráttu Bestu deildarinnar.

Til þess að það gerist þurfa þeir að leggja Víking að velli en Íslandsmeistararnir hafa gert jafntefli í þremur síðustu deildarleikjum sínum. Þeir unnu hádramatískan 5-3 sigur á KR í Mjólkurbikarnum á fimmtudaginn var og hafa eflaust nýtt helgina í að leyfa mjólkursýrunni að dafna þar sem liðið hefur leikið fjölmarga leiki á undanförnum vikum.

Víkingur féll úr leik í undankeppni Sambandsdeildar Evrópu eftir framlengdan leik í Póllandi til að finna síðasta tapleik liðsins á Íslandi þarf að fara aftur til 16. maí er Breiðablik vann 3-0 sigur er liðin mættust í Víkinni.

Síðan þá hafa lærisveinar Arnars Gunnlaugssonar leikið 17 leiki hér á landi án þess að bíða ósigur. Það þarf því eitthvað undan að láta er Valur mætur á Heimavöll hamingjunnar í Víkinni, annað hvort endar gott gengi Íslands- og bikarmeistaranna hér á landi eða Valur stimplar sig af fullum þunga inn í toppbaráttuna. Eða þá að Víkingar gera sitt fjórða jafntefli í röð í Bestu deildinni en það nennir því samt í raun enginn.

Leikur Víkings og Vals hefst klukkan 20.15 og er í beinni útsendingu Stöðvar 2 Sport. Útsending hefst stundarfjórðung áður eða klukkan 20.00.

Fallbaráttan

Þá hefjast tveir leikir klukkan 18.00 í dag. Eftir samstöðufund á föstudagskvöld þá tekur FH á móti Keflavík í Kaplakrika. Heimamenn eru að berjast fyrir tilverurétti sínum í efstu deild á meðan Keflavík lætur sig dreyma um að vera í efri helmingnum er deildinni verður skipt upp.

Sá leikur er einnig sýndur beint á Stöð 2 Sport. 

Í Breiðholti mætast Leiknir Reykjavík og KR í Reykjavíkurslag. Breiðhyltingar hafa átt erfitt uppdráttar og sitja á botni deildarinnar eftir sigur ÍA á sunnudag. Með sigri gæti Leiknir þó komist upp úr fallsæti fari svo að FH nái ekki að vinna Keflavík.

KR hefur sömuleiðis ekki átt góðu gengi að fagna í sumar. Liðið er í 6. sæti en getur með (tveggja marka) sigri farið upp fyrir Stjörnuna ásamt því að brúa bilið milli sín og Vals fari svo að lærisveinar Óla Jó nái ekki í stig eða sigur í Víkinni. 

Að leikjum kvöldsins loknum, klukkan 22.15, er Stúkan á dagskrá. Þar verður farið yfir alla leiki kvöldsins sem og leiki gærdagsins í Bestu deildinni.