Dan­merkur­meistarinn Viktor Gísli: „Stað­ráðinn í að láta þetta ganga upp“

GOG varð danskur meistari í áttunda sinn í sögu félagsins á sunnudag. Viktor Gísli ræddi við Vísi um sigurinn, heimförina og framhaldið en landsliðsmarkvörðurinn heldur til franska stórliðsins Nantes í næsta mánuði. Hann gat því vart endað þriggja ára dvöl sína í Danmörku betur.

„Það var alvöru stemmning í rútunni og við fengum geggjaðar móttökur þegar við loks skiluðum okkur heim. Heill haugur af fólki, flugeldum skotið upp, blys og allur pakkinn bara,“ sagði Viktor Gísli um fagnaðarlæti sunnudagsins. 

Það var þó ekki numið staðar þar og hafa fagnaðarlætin haldið áfram: „Erum búnir að fagna síðustu tvo daga og þriðji hittingurinn er núna í kvöld,“ bætti Viktor Gísli við en Vísir heyrði í honum á þriðjudag.

Reynslan skipti sköpum

Blaðamaður á alltaf erfitt með þegar fyrirkomulag er ekki eins og þekkist á Íslandi. Viktor Gísli útskýrði yfirvegað að í Danmörku þyrfti í raun að ná í þrjú stig til að klára úrslitaeinvígi. 

Það var því ljóst að eftir fyrri leikinn – sem lauk með jafntefli – að sigurvegari sunnudagsins yrði Danmerkurmeistari. Eftir langt og strembið tímabil voru allir frekar sáttir við að eiga möguleika á að klára dæmið.

„Það var geggjuð stemmning á leiðinni til Álaborgar líka. Vorum allir mjög sáttir við að þetta yrði síðasti leikurinn á tímabilinu. Erum sérstaklega sáttir núna. Geggjað að leggja Álaborg loksins, erum búnir að reyna í þrjú ár og það tókst loksins.“

„Myndi segja að aukin reynsla sé það sem gerði gæfumuninn. Höfum fengið inn reynslumikla menn og höfum almennt verið að bæta við reynslu síðan ég kom, svo erum við sem höfum verið hér allan tímann líka reynslunni ríkari.“

„Aldrei náð að klára þá.“

„Í gegnum þessi þrjú tímabil sem ég hef verið hérna höfum við alltaf staðið í Álaborg en aldrei náð að klára þá. Höfum kannski staðið í þeim fyrstu 40 mínúturnar og svo kastað því frá okkur undir lokin. Nú náðum við að halda ró okkar og í raun stela þessu í lokin, við áttum ekki skilið að vinna en náðum að stela þessu á síðasta korterinu. Það sýndi reynsluna sem býr í liðinu.“

Frá Fjóni til Frakklands

Viktor Gísli, sem er uppalinn hjá Fram í Reykjavík, hefur búið í Óðinsvé á Fjóni síðan hann flutti til Danmerkur fyrir þremur árum síðan. Þó um sé að ræða nokkuð stóra borg á danskan mælikvarða þá heldur stærri og meiri borg sem og félagið er töluvert stærra í sniðum en GOG. 

Hinn 21 árs gamli Viktor Gísli er þó hvergi smeykur og segir að sem stendur sé allt að fara eftir áætlun.

„Það var alltaf planið að vera þrjú ár í Danmörku og færa mig svo yfir í Meistaradeildarlið. GOG er vissulega slíkt lið núna – sem er mjög gaman – en það var alltaf planið að fara í stærra lið og stærra umhverfi eftir þrjú ár.“

„Ég spilaði á móti Nantes stuttu eftir jól og náði aðeins að skoða aðstæður þá. Svo fæ ég íbúðina sem Emil Nielsen – markvörður liðsins á síðustu leiktíð – var í. Klúbburinn sér alveg um það, sem er mjög jákvætt. Ég sé því bara um að pakka hérna og mæti svo hress til Frakklands 20. júlí.“

Tók þýsku í menntaskóla

Franska er ekki einfaldasta mál í heimi og það hjálpar Viktori Gísla ekki mikið að hafa tekið þýsku í menntaskóla á sínum tíma. Hann hefur hins vegar þegar hafið undirbúning og verður eflaust orðinn franskur áður en langt um líður.

„Ég er byrjaður í frönsku námi, það gengur samt ekkert alltof vel. Þarf að vera duglegur að taka aukatíma þegar ég kem til Frakklands, reyna að bulla eitthvað og gera mig að fífli. Ætla að reyna að vera fljótari að koma mér inn í hlutina þar heldur en ég var hér.“

„Ég var mjög heppinn að vera með tvo Íslendinga með mér þegar ég kom út til Danmerkur á sínum tíma. Annars vegar Óðinn Þór (Ríkharðsson) og svo Arnar Frey (Arnarsson) sem var með mér í Fram. Það er var í raun algjör draumastaða fyrir ungan leikmann eins og mig.“

Bjó þríeykið – líkt og allir leikmenn GOG – Óðinsvé. Þaðan er keyrt til Gudme, þar sem GOG er staðsett, á æfingar og í leiki. 

„Þetta er rúmlega hálftíma keyrsla, sem er bara fínt.“ 

„Staðráðinn í að láta þetta ganga upp.“

„Fyrsta tímabilið var frekar stutt út af Covid-19, var farinn heim í lok febrúar eða snemma í mars,“ sagði markvörðurinn aðspurður hvaða áhrif kórónuveiran hefði haft á feril hans sem atvinnumaður en hún skall á skömmu eftir að Viktor Gísli flutti til Danmerkur.

„Annað var árið var svo í raun erfiðasta árið. Þá var maður byrjaður að reyna tala dönsku og komast almennilega inn í liði. Það voru samt erfiðir mánuðir því Covid-19 var enn í gangi og allt sem fylgdi því. Maður lét það þó ekki stoppa sig þar sem manni hefur dreymt um þetta í fleiri ár. Ég var staðráðinn i að láta þetta ganga upp.“

„Ég er samt mjög spenntur að koma heim í smá, þetta er búið að vera langt tímabil. Fæ þrjár og hálfa viku áður en ég fer til Frakklands. Eins spenntur og ég er að halda áfram með minn feril þá er ég feginn að komast í smá frí. Þetta getur verið svolítið brútal og það er ekki langt frí sem maður fær á milli tímabili en þetta er fórnin sem maður þarf að færa til að ná langt í þessu og ég kvarta ekki,“ sagði landsliðsmarkvörðurinn Viktor Gísli Hallgrímsson að endingu.