Gular við­varanir í gildi til mið­nættis

Á Suðurlandi tekur viðvörunin gildi klukkan níu en þar er spáð austan hvassviðri og þrettán til átján metrum á sekúndu. Það bætir síðan enn í vind síðdegis, átján til 23 metrar undir Eyjafjöllum og við Reynisfjall. Þá má búast við að hviður fari í þrjátíu metra staðbundið.

Á Suðausturlandi mætir veðrið nokkru síðar, eða í hádeginu og þar er spáin svipuð nema að hviður gætu farið í þrjátíu og fimm metra staðbundið.

„Skaplegra veður í öðrum landshlutum með hita á bilinu 7 til 17 stig, þá hlýjast á Suðvestur- og Vesturlandi og norðaustantil.

Norðaustlæg átt á morgun og áfram allhvass vindur sunnantil fram eftir degi. Rigning suðaustan og austanlands en annars úrkomulítið og bjart vestantil. Svipaður hiti, áfram hlýjast á Vesturlandi. Eins kólnar dálítið norðaustanlands en hlýnar norðvestantil,“ segir á vef Veðurstofunnar.

Veðurhorfur á landinu næstu daga

Á föstudag: Norðaustan og austan 5-13 m/s, en allhvass vindur með suður- og suðausturströndinni fram eftir degi. Rigning suðaustan- og austanlands, annars úrkomulítið og bjart vestantil. Hiti 8 til 17 stig, hlýjast á Vesturlandi.

Á laugardag: Norðaustan og síðar norðan 5-13 m/s, hvassast með suðausturströndinni og norðvestanlands. Rigning með köflum austan- og norðaustantil og einnig dálítil væta í öðrum landshlutum. Hiti 6 til 11 stig fyrir norðan en 11 til 17 stig sunnanlands.

Á sunnudag (sjómannadagurinn): Norðlæg átt 5-10 m/s og dálítil úrkoma norðanlands en bjart með köflum sunnantil. Hiti breytist lítið.

Á mánudag: Suðaustlæg átt 5-13 m/s, hvassast með suðurströndinni. Dálítil rigning um sunnan- og vestanvert landið en skýjað með köflum og þurrt norðanlands. Hiti 8 til 13 stig, hlýjast á Norðausturlandi.

Á þriðjudag: Austanátt og bætir í úrkomu um allt land en þó þurrt að mestu fram eftir degi norðantil. Hiti 6 til 14 stig, hlýjast vestanlands.

Á miðvikudag: Útlit fyrir austlæga átt og litilsháttar úrkomu í flestum landshlutum, einkum sunnantil. Svipaður hiti.