Segir Úkraínumenn tilbúna fyrir átökin: „Við munum berjast“

„Nú getum við sagt að rússneskir hermenn hafi hafið baráttuna um Donbas sem þeir hafa lengi verið að undirbúa sig fyrir. Stór hluti rússneska hersins beinir nú athygli sinni að þessari sókn,“ sagði Selenskí í ávarpi sínu í kvöld.

„Óháð því hversu margir rússneskir hermenn verða sendir þangað, þá munum við berjast. Við munum verja okkur. Við munum gera þetta á hverjum degi. Við munum ekki gefa eftir neitt sem er úkraínskt og við þurfum ekki eitthvað sem við eigum ekki,“ sagði hann enn fremur.

Þá sagði hann rússneska herforingja þurfa að fara varlega, í ljósi þess gríðarlega mannfalls sem rússneski herinn hefur orðið fyrir, annars verði enginn eftir til að berjast fyrir þá. Selenskí þakkaði úkraínskum hermönnum og sagði þá enn standa keika.

„Það er aðeins tímaspursmál hvenær við náum að frelsa öll svæði okkar ríkis,“ sagði Selenskí.

Reyna að komast í gegnum varnir Úkraínumanna

Oleksiy Danilov, yfirmaður þjóðaröryggis- og varnamálaráðs Úkraínu, greindi frá því í sjónvarpsávarpi í dag að rússneskar hersveitir reyni nú að komast í gegnum varnir Úkraínumanna á þremur svæðum, það eru Luhansk, Donetsk og Kharkív.

„Sem betur fer hefur herinn okkar náð að þrauka og aðeins í tveimur borgum hafa [rússneskir hermenn] komist áfram,“ sagði Danilov. „En átökin halda áfram, við munum ekki gefa upp landsvæði okkar og tilraunin til að hefja næsta virka fasa hófst í morgun.“

Andriy Yermak, yfirmaður skrifstofu Úkraínuforseta, sagði sömuleiðis fyrr í dag að „annar fasi stríðsins“ væri hafinn í Donbas en að hann hafði trú á úkraínskum hermönnum.

Sameinuðu þjóðirnar segja vopnahlé í Úkraínu ekki vera á sjóndeildarhringnum að svo stöddu en að það gæti gerst innan næstu vikna. Martin Griffiths, aðstoðarframkvæmdastjóri mannúðardeildar Sameinuðu þjóðanna, sagði það fara eftir því hvernig viðræður ganga á næstunni.

Engar öruggar borgir í Úkraínu

Alls hafa átta almennir borgarar látist í árásum Rússa það sem af er degi í Donbas. Fjórir létust í árás í Donetsk héraði auk þess sem fjórir létust í borginni Keminna í Luhansk héraði þegar borgin féll í hendur Rússa í nótt.

Árásir hafa einnig verið tilkynntar víðar í dag en í vesturhluta landsins létust sjö í Lviv í nótt og í norðurhluta landsins létust tveir í Kharkív.

Lviv er aðeins um sextíu kílómetra frá landamærum Úkraínu og Póllandi hefur þótt nokkuð örugg þar sem lítið hefur verið um átök svo vestarlega í landinu en undanfarið hafa átökin verið hvað hörðust í austurhluta landsins.

Flóttafólk hefur leitað skjóls í borginni og margir farið þar í gegn á leið sinni til Póllands. Með loftárásunum í nótt sendu Rússar skýr skilaboð um að hvernig í landinu sé öruggt að vera.

„Í dag eru engar öruggar borgir í Úkraínu. Í dag eru allir í sömu stöðu,“ sagði Andriy Sadovy, borgarstjóri Lviv, um málið í dag.

Pútín segir stefnu Vesturveldanna hafa misheppnast

Vladimír Pútín Rússlandsforseti heiðraði í dag hersveit sem var í bænum Bútsja þar sem hundrað almennir borgarar létu lífið. Stjórnvöld í Úkraínu hafa sagt að stríðsglæpir hafi verið framdir þar. 

Þá sagði forsetinn í dag efnahagsþvinganir Vesturveldanna ekki hafa skilað tilætluðum árangri.

„Við getum nú sagt með fullri vissu að þessi stefna gagnvart Rússlandi hefur misheppnast. Hin efnahagslega leiftursókn virkaði ekki. Aukinheldur komust sjálfir upphafsmennirnir ekki upp með refsiaðgerðirnar,“ sagði Pútín.