Sagði frá erfiðri fæðingu þar sem hún upp­lifði að ekki væri á hana hlustað

Lilja sagðist hafa ákveðið að stíga fram og greina frá þessari reynslu sinni eftir að hafa horft á viðtal við Bergþóru Birgisdóttur í Kveik í gær. Þar sagði Bergþóra frá afar erfiðri fæðingu dóttur hennar, sem varð til þess að Bergþóra örkumlaðist. Greindi hún frá því að hún hafi upplifað það af áhyggjur hennar í aðdraganda fæðingarinnar hafi ekki verið teknar alvarlega.

Í Kastljósi sagði Lilja að frásögn Bergþóru hefði hreyft við sér.

„Hún gerir það vegna þess að ég upplifði mjög erfiða fæðingu, 2007. Mjög svipaða reynslu. Það er að segja að ég gekk með stórt barn og er ekkert mjög stór,“ sagði Lilja.

„Ég fer að hafa mjög miklar áhyggjur af þessari fæðingu og fer að tala um það við mína ljósmóður. Ég finn að það var, mjög fín ljósmóðir, en það var ekki beint hlustað á mig. Ræði svo við einn lækni sem reyndar hlustaði á mig en það reyndi ekkert á það þegar við komum inn í fæðinguna,“ sagði hún enn fremur.

Teflt á tæpasta vað

Sagði hún fæðinguna sjálf hafa verið erfiða, staðið yfir í 24 tíma og alls komu þrjár vaktir að henni. Á meðan fæðingunni stóð viðraði Lilja áhyggjur sínar af gangi mála.

„Ég er stöðugt að segja, þetta er bara rosalega erfitt og svona en upplifði það samt að maður væri að kvarta að óþörfu. Það er skemmst frá því að segja að það er teflt á tæpasta vað. Drengurinn er tekinn út með sogklukku, hann andar ekki. Hann er tekinn helblár út. Bara sagt við okkur að líklega sé um súrefnisskort að ræða af því hvað þetta var tæpt,“ sagði Lilja.

„Ég var búinn að segja að minnsta kosti allan tímann og vitnaði í Reyni Tómas Geirsson, kvensjúkdómalækni, af því að ég hafði talað við hann áður, að höfuðið á barninu væri mjög stórt,“ sagði Lilja.

Hún upplifði það sem svo að lítið sem ekkert hafi verið hlustað á hennar áhyggjur.

„Það var ekkert hlustað. Við eftir þessa fæðingu vorum auðvitað í algjöru losti. Ég, sem betur fer, jafnaði mig þó. Það tók auðvitað einhvern tíma. Það var ofboðslega erfitt að sitja undir því að það var ekkert hlustað. Svo fer þetta svona. Manni fannst eins og maður hefði ekki rödd,“ sagði Lilja.

Hvött til að fara með málið lengra en taldi að enginn myndi hlusta

Í þættinum sagði hún einnig að læknir sem hún hefði talað við á Landspítalanum skömmu eftir fæðinguna hefði sagt henni að útlit væri fyrir að drengurinn væri heilbrigður, sem reyndist svo vera. Hvatti læknirinn hana til þess að stíga fram og greina frá því sem gerðist í fæðingunni.

Sagðist hún hafa íhugað það á sínum en ákveðið að láta ekki verða að því.

„En svo fann ég einhvern veginn að það hlustaði enginn á mig fyrir þetta, það hlustaði enginn á mig í þessari fæðingu, af hverju ætti einhver að hlusta á mig? Ég fór einhvern veginn út og hugsaði að ég ætlaði ekki að rugga þessum bát,“ sagði Lilja.

Í Kastljósi sagðist hún hafa ákveðið að fara með mál sitt til Embættis landlæknis eftir að Sigríður Eyrún Friðriksdóttir og Karl Olgeir Olgeirsson stigu fram og greindu frá læknamistökum sem urðu til þess að nýfæddur sonur þeirra lést.

„Það var alveg eins, en eini munurinn var að okkar drengur lifði en ekki þeirra,“ sagði Lilja. Ekkert kom hins vegar út úr kvörtun Lilju til Landlæknis. Eftir að hafa horft á viðtalið við Bergþóru í gær sagðist Lilja hafa fundið sig knúna til að stíga fram og segja frá eigin reynslu.

„Ég vil að það sé hlustað meira á konur, ég stend með Bergþóru og hennar fólki út í hið óendanlega.“

Telur hún að hlusta þurfi betur á konur og aðra sem leita sér þjónustu á heilbrigðisstofnunum. Mögulega þyrfti að koma á fót embætti Umboðsmanns sjúklinga sem gæti hagsmuna þeirra.

„Ég tel ekki að þetta eigi að vera refsivert gagnvart ljósmæðrum eða einstaka læknum. Ég held að það sé ekki rétt. En það má ekki vera þannig að við sem lendum í einhverju svona að það sé horft framan í okkur og sagt þetta var ekkert. Þetta var heilmikið,“ sagði Lilja, sem sagðist einnig vonast til að þurfa aldrei aftur að heyra viðlíka sögu og þá sem Bergþóra sagði í gær.

„Ég get ekki hugsað mér að heyra aðra svona sögu.“