Rússar segjast hafa náð markmiðum sínum og einbeita sér að Donbas

Á blaðamannafundi Varnarmálaráðuneytis Rússlands í dag hélt Sergey Rodskoy, herforingi, því fram að flugher Úkraínu hefði næstum því verið þurrkaður út og flotinn væri ekki lengur til staðar. Hann sagði að minnst fjórtán þúsund úkraínskir hermenn hefðu verið felldir og minnst sextán þúsund særðir.

Úkraínumenn ættu ekkert varalið að lítið þjálfuðum sjálfboðaliðum undanskildum.

Rodskoy hélt því einnig fram að margar borgir Úkraínu væru umkringdar og þar á meðal Kænugarður, sem er ekki rétt, og sagði hann markmiðið með því að koma í veg fyrir að Úkraínumenn myndu gætu sent liðsauka til Donbas.

Ummæli herforingjans þykja til marks um að Rússar ætli mögulega að draga úr umfangi innrásarinnar. Hann sagði þó að aðgerðum Rússa yrði haldið áfram þar til ótilgreindum markmiðum væri náð.

Segjast hafa haft tvö markmið í huga

Í frétt Interfax fréttaveitunnar, sem er í eigu rússneska ríkisins, er haft eftir Rosdkoy að yfirvöld í Rússlandi hafi íhugað tvö stór markmið í Úkraínu. Annað hafi verið að taka Donbas-hérað og hitt hafi verið að taka alla Úkraínu.

Sókn Rússa hefur verið stöðvuð víða um Úkraínu og við Kænugarð og suður við Mykolaiv hafa Úkraínumenn gert vel heppnaðar gagnárásir á Rússa.

Rússar hafa lagt mikið púður í því að hernema allt Donbas-hérað. Skömmu fyrir innrásina lýsti Vladimír Pútín, forseti Rússlands, því yfir að Rússland viðurkenndi yfirráðasvæði tveggja fylkinga aðskilnaðarsinna í Donbass sem sjálfstæð lýðveldi. Þau kallast Donetsko og Luhansk og Pútín lýsti því yfir að yfirráðasvæði þessara lýðvelda ætti að vera allt Donbas-hérað.

Aðskilnaðarsinnarnir stjórnuðu þó einungis um þriðjungi héraðsins og það gerður þeir með aðstoð Rússlands árið 2014.

Taldir ætla að króa fjórðung hers Úkraínu af

Í gær var sagt frá því á Vísi að sérfræðingar teldu Rússa ætla að leggja meiri áherslu á Donbas og reyna að króa af stóran hluta úkraínska hersins sem er þar.

Talið er að allt að fjörutíu þúsund úkraínskir hermenn, þjálfaðir og reynslumiklir, séu á víglínunni í Donbas. Það myndi samsvarar um fjórðungi af herafla Úkraínu, þegar innrás Rússa hófst fyrir mánuði síðan.

Herdeildirnar í Donbas hafa átt í átökum nánast samfleytt í átta ár og hafa fengið umfangsmikla þjálfun frá Bandaríkjamönnum, Bretum og Kanadamönnum. Þá hafa þeir haft átta ár til að undirbúa varnir sínar og eru taldir í góðum varnarstöðum.

Gáfu tölur um mannfall í fyrsta sinn í margar vikur

Fyrr í dag gáfu Rússar það út að 1.351 rússneskur hermaður hefði fallið í átökum í Úkraínu og 3.825 hefðu særst.

Þetta er í fyrsta sinn í margar vikur sem Rússar gefa út tölur um mannfall í Rússlandi en áður höfðu þeir sagt að 498 hefðu fallið.

Þessar tölur hafa þegar verið dregnar í efa en forsvarsmenn Atlantshafsbandalagsins sögðu í gær áætlað að sjö til fimmtán þúsund rússneskir hermenn hefðu fallið. Væru særðir, týndir og handsamaðir hermenn taldir með gæti fjöldinn verið um fjörutíu þúsund.