Líf milljóna manna í algerri upplausn og neyð

Ekkert lát er á straumi flóttafólks til nágrannaríkja Úkraínu í vestri og nú er talið að fjöldinn sé orðinn um 2,2 milljónir manna. Þá eru milljónir manna ýmist króaðar af í kjöllurum í borgum og bæjum víðs vegar um Úkraínu við afar þröngan kost eða á faraldsfæti.

Ástandið er einna verst í Mariupol í suðausturhluta Úktaínu þar sem börn, konur og gamalmenni hafa hafst við dögum saman og nú segir borgarstjórinn þar að matarbirgðir verði á þrotum eftir þrjá daga.

Fullorðnir og börn féllu í árás á sjúkrahús

Frá klukkan sjö í morgun til sjö í kvöld átti að ríkja vopnahlé á ákveðum leiðum frá um tíu borgum og bæjum þannig að hægt yrði að koma óbreyttum borgurum frá átakasvæðum. Slíkar tilraunir hafa margoft runnið út í sandinn í Mariupol þar sem borgarstjórinn segir lík liggja á víð og dreif á götum. Fólk reynir samt að bjarga sér við þessar ótrúlegu aðstæður.

Nú síðdegis fordæmdi Zelenskyy Úkraínuforseti á Twitter sprengjuárás Rússa á fæðingarsjúkrahús í Maríupol og birti myndir þaðan. Sjúkrahúsið er nánast í rúst eftir árásina. Ekki hefur verið greint frá mannfalli en forsetinn segir fullorðna og börn grafin í rústunum.

Aleksey Berntsev formaður Rauða krossins í Mariupol segir borgina lamaða.

„Það er enginn húshitun, rafmagn, vatn, gas eða samband. Með öðrum orðum það virkar ekkert, engin heimilistæki. Vatni er safnað af þökum þegar það rignir," segir Berntsev.

Rauða krossliðar heimsóttu meðal annars konur og börn sem voru í stórum hópi í kjallara og spurðu um helstu nauðsynjar. Þar var þeim sagt að öldruð kona þyrfti á hjartalyfjunum sínum að halda og börnin þyrftu að fá lyf við niðurgangi.

Flýja með gamalmenni í innkaupakerrum

Ástandið er einnig mjög slæmt í fjölmörgum borgum eins og Kharkiv og bæjarfélögum og úthverfum norður af Kænugarði. Gífurlega fjölmennar og þungvopnaðar rússneskar hersveitir nálgast höfuðborgina úr norðri og aðrar úr austri.

Íbúar Irpin þar sem rúmlega sextíu þúsund manns búa flúðu fótgangandi í átt til Kænugarðs í dag. Þar voru aðallega konur, börn og gamalmenni á ferð sem nutu aðstoðar úkraínskra hermanna. Hermenn sáust hlaupandi með ungabörn og gamlar konur og karlar voru keyrð áfram í innkaupakerrum eða yngri menn báru þau á bakinu.

Þar mátti einnig sjá einstaka gæludýr sem fólk greip með sér áflóttanum. Einn kattareigandinn horfði til himins og sagði: „Þeir ættu að loka lofthelginni svo við getum barist við Pútín.“

„Hér bíður ykkar ekkert nema fangelsi eða dauði“

Þar stendur hnífurinn í kúnni. Volodymyr Zelenskyy forseti Úkraínu þrábiður NATO að útvega sér herþotur. Pólverjar eiga rúmlega tuttugu rússneskar herþotur sem Úkraínumenn eru þjálfaðir á og vilja afhenda þær í gegnum bandaríska herstöð í Þýskalandi sem Bandaríkjamenn telja ekki ráðlegt því það kunni að stigmagna átökin við Rússa.

Zelenskyy skoraði í dag á rússneska hermenn að leggja niður vopn í vonlausri baráttu við úkraínsku þjóðina sem aldrei muni gefst upp.

„Ekki trúa herforingjum ykkar sem segja að þið eigið enn möguleika í Úkraínu. Hér bíður ykkar ekkert nema fangelsi eða dauði. Þið eru að fella okkar fólk og við munum svara í sömu mynt. Við getum hlerað samskipti herforingja ykkar og vitum að þeir gera sér grein fyrir þessari stöðu. Það þarf að binda enda á þetta stríð, við þurfum að snúa aftur til friðar," sagði Úkraínuforseti í ávarpi sínu til rússneskra hermanna.