Rússneskur almenningur finnur fyrir refsiaðgerðum

Árni Þór Sigurðsson sendiherra Íslands í Rússlandi segir óvissuna sem fylgi stríðinu erfiða fyrir marga Rússa. Þá finni almenningur nú fyrir þeim refsiaðgerðum sem Rússar hafi verið beittir vegna innrásarinnar í Úkraínu.

„Þar á ég auðvitað við það að gengi rúblunnar hefur hríðfallið, hlutabréfamarkaðir eru í einhverju frosti og verðbólga er komin á skrið og fólk verður auðvitað vart við það að verðlag hefur hækkað bara á mjög skömmum tíma og jafnvel einhver skortur á einhverjum vörum.“

Hins vegar sé ekki að sjá að refsiaðgerðirnar séu farnar að hafa nein áhrif á stefnu rússneskra stjórnvalda.

„Minnsta kosti ekki enn sé komið er og það er í raun og vera það sama og menn sáu eftir innlimun Krímar árið 2014. Það voru auðvitað allskonar þvingunaraðgerðir eða refsiaðgerðir þó þær væru ekki af sama krafti og núna en þær gátu samt sem áður bitið á einstaklinga og fyrirtæki en ekki á stefnu stjórnvalda. Það gerist myndi ég telja síðar.“

Fólk beðið um skilríki og símar skoðaðir

Árni segir sýnileika lögreglu meiri en áður í landinu og ólgan meðal almenning sé nokkur.

„Það sem við verðum auðvitað vör við er það virðist vera aukinn löggæsla. Við sjáum meira af lögreglu og jafnvel hermönnum á götum út. Það eru fréttir af því að fólk sé beðið um skilríki og jafnvel beðið um að sýna símana sína og þess háttar þannig að því leiti til þá sjáum við það. Síðan vitum að það voru mótmæli hér bæði í Moskvu og Pétursborg og fleiri borgum eins og til að mynda um helgina.“

Rússnesk stjórnvöld hafa reynt að stýra því vel hvað almenningur sér og heyrir um stríðið.

„Fjölmiðlar hér þeir eru mjög tengdir stjórnvöldum. Sérstaklega sjónvarpsstöðvarnar og fjalla um á þeim grunni sem að stjórnvöld matreiða og það má segja hin almenna sýn sem að rússneskur almenningur fær af stöðunni en auðvitað eru líka fjöldinn allur af fólki hér sem að hefur aðgang að erlendum fjölmiðlum, les erlend tungumál og fær aðra mynd en blasir við ef að menn horfa bara á rússneskar sjónvarpsstöðvar.“

Aðgangur fólksins að fréttum hefur einnig verið takmarkaður. 

„Það eru vissar stöðvar sem að hefur verið lokað á eins og BBC. Svo hefur verið lokað á Facebook, Twitter, Youtube en það eru ýmsar fréttir enn þá getum við lesið íslensku blöðin á vefnum.“

Aðstæður geta breyst hratt

Árni segir að fólki sem ekki á sérstakt erindi til Rússlands sé nú ráðlagt frá því að ferðast þangað. Nokkuð sé um Íslendinga í landinu eða fólk með tengsl við landið og sendiráðið sé í góðu sambandi við þann hóp og ráðleggi hvað sé best að gera í stöðunni.

Hann segir veru sína og annara sendiráðsstarfsmanna í landinu mikilvæga nú sem fyrr enda sýni sagan það að talsamband á milli ríkja skipti máli þegar erfiðleikar eru í samskiptum. Sjálfur taki hann öllu enn með ró.

„Mér líður í sjálfu sér ágætlega. Ég er ekkert sérstaklega óttasleginn yfir stöðunni en aðstæður breytast hratt og við erum bara mjög vel á verði hérna við sem að störfum í sendiráðinu hérna og við höfum viðbragðsáætlanir í gangi þannig að við getum brugðist við breyttum aðstæðum hratt og örugglega.“